Nagtitipon ti nadumaduma a grupo iti Welcome Rotunda idiay Quezon City idi Mayo 15 kas pannakikaykaysa iti pananglagip ti umili a Palestino iti maika-78 anibersaryo ti Al Nakba. Inyawag da ti pannakawayawaya ti Palestine manipud iti naranggas nga okupasyon ti Zionista nga Israel. Ti tignay ket inyuna ti Philippines-Palestine Friendship Association. Awit dagiti nagprotesta dagiti bandera ti Palestine ken dagiti plakard a mangiyeb-ebkas ti suporta kadagiti Palestino.

Papanawen dagiti soldado nga Israeli. Immawag ti hustisya ken sungsungbatan dagiti residente ti General Luna iti Siargao Island idiay Surigao del Norte kalpasan ti serye dagiti krimen ken kinaranggas kadakwada dagiti soldado nga Israeli nga agdakdakiwas iti isla. Nakimiting da kadagiti lokal nga upisyal, pulis, dagiti negosyante ken dadduma pay a sektor idi Mayo 12 tapno talantanen ti agsasaruno nga insidente ti kinaranggas, pananggulo ken panagbastos dagiti soldado nga Israeli iti isla.

Kaudyan ken kakarwan, ti panagraut ti maysa a grupo dagiti Israeli iti Cartoon Cafe idiay General Luna idi Mayo 11. Segun kadagiti ulat, nagbabaraan dagiti soldado ti establisyemento idi nakita da ti maysa a bandera ti Palestine a nakasab-it iti ruar daytoy. Naiyulat a dinadael dagiti soldado ti CCTV camera ken pisikal a binugbog da ti agassawa a makinkukwa iti negosyo, iti sango dagiti babassit nga annak da. Dagitoy a soldado ket naiyulat a karuruar pay laeng iti “serbisyo” iti gera a henosidyo nga iyar-aramid ti Zionista nga estado laban iti Palestine.