Idi Mayo 15, linagip ti umili a Palestino ti maika-78 tawen nga anibersaryo ti Al Nakba iti tengnga ti napegges a gera a henosidyo ti US-Israel. Ti Al Nakba (Ti Didigra) ti nadara a panangpatalaw dagiti Zionista a grupo iti Palestine idi 1948 tapno ibangon ti estado nga “Israel” iti duron ti imperyo a British.

Ibilbilang ti umili a Palestino ti agtultuloy a henosidyo kas “baro ken narungrungsot a tukad ti Al Nakba.” Kas iti napalabas, galad daytoy ti panagmasaker ti adu nga umili, panangbisin, panangdadael kadagiti pagtaengan ken imprastruktura ken pwersado a panagpatalaw tapno naan-anay a buraen ti puli a Palestino.

Manipud Oktubre 2023, pinulbos dagiti Zionista ti intero a Gaza usar dagiti bala ken bomba nga aramid ken inted ti US. Iti upisyal a rekord, dumandanonen iti 75,000 ti direkta a pinatay ti panagraut ken ginasut a ribo pay ti saan a direkta a natay iti bisin, sakit, nagabburan iti nargaay a pasdek ken dagiti saanen a mabirokan. Saan a nagsardeng dagiti Zionista iti panagatake uray nakitulag daytoy iti ceasefire manipud Oktubre 2025.

Inkeddeng ti Zionista nga estado ti baro a panagagaw ti daga babaen ti panangiyuged ti “yellow line” iti uneg ti Gaza. Nagitakder daytoy ti 13 a baro a detatsment militar tapno ipasidong iti kontrol daytoy ti 53-58% ti teritoryo. Sinaklaw daytoy ti 50-60% dagiti daga a pagtalonan bayat nga inkulong da dagiti Palestino iti naiilet a sentro ti ebakwasyon nga adayo kadagiti daga a produktibo ken pagbiagan da.

Kagiddan iti henosidyo iti Gaza, in-inot a saksakupen ti Israel ti intero a West Bank ken East Jerusalem. Inaldaw a makapadpadas dagiti Palestino kadagitoy a lugar ti panaglipit, panagsiput ken panagpatalaw. Iti gibus ti 2025, nasurok 700,000 Zionista a setler ti agin-indegen iti nasurok 250 nga iligal a settlement iti uneg dagiti nasao a lugar.

Saan a paikuspil

Iti laksid ti kinaulpit ken teror ti panagsakop, natibker ti takder ti umili a Palestino nga agtalinaed iti pagilyan da, kasta met ti karbengan ti amin a napatalaw nga agsubli ken subboten ti daga ken teritoryo nga inagaw kadakwada. Iggem ti napalabas a nasurok maysa a siglo dagiti rebolusyon ken panagrukwas, saan da nga uman-annugot a mapasamak ti maysa pay a didigra wenno ti “Al Nakba 2.0.”

Manipud idi naiyaramid ti Al Aqsa Flood, ti armado a panagrukwas idi 2023, balbaliw a napaneknekan ti kinausto ti dangadang ti Palestino. Balbaliw a naikabil ti nainkalintegan a panaglaban da iti sentro dagiti institusyon nga internasyunal. Kas suporta, minilyon ti bimmuyat kadagiti kalsada ti Europe, America, Africa ken Asia. Binigbig ti sangalubongan ti dangadang da kas laban para iti wayawaya, hustisya, dayaw ken sangkataw-an ken saan a susik laeng kadagiti nagbebeddengan, ken ad-adda a saan a kanaig iti “panangsalaknib iti bagi” ti Israel.

Labes pay ditoy, naiparang dagiti nakaam-ames a krimen ti Zionista nga Israel a ti nabayag a panawen ket naibilangen a “normal,” uray iti adu nga estado nga Arabo. Naan-anay a nareggaayen ti ilusyon ti Israel kas “naisangsangayan a demokrasya” iti Middle East ken naibunannag kas baro a “Nazi” a kagurgura ti sangalubongan. Nabigbig ti kinakaro ken kasaknap dagiti krimen daytoy iti gubat ken sangkataw-an iti International Court of Justice ken International Criminal Court.

Ekspansyunismo iti duron ti US

Labes iti Palestine, saksakupen met dagiti Zionista ti dadduma pay a paset ti Middle East iti sidong ti kampanya a Greater Israel. Ultimo a panggep daytoy a sakupen dagiti nababaknang a teritoryo ken kanal manipud iti Karayan Nile ti Egypt agingga iti Karayan Euphrates iti Iraq.

Idiay Lebanon, rinugyan daytoy ti panangiyaplag ti “yellow line” a dumandanon ti 10 kilometro iti kaabagatanan a paset kalpasan ti awan sarday a panangbomba daytoy iti lugar manipud Marso. Idiay Syria, iligal a sinakop ti Israel ti Golan Heights manipud pay 1967. Iti laksid dagiti resolusyon ti United Nations a mangimanmandar nga isubli ti teritoryo, tuluy-tuloy ti panangitakder daytoy kadagiti iligal a komunidad ken industriya kadagiti paset a nabaknang iti danum ken nadam-eg a daga.

Adda iti likod dagitoy nga agresyon ti imperyalismo a US, babaen ti binilyon a pondo a militar ken armas, tapno pagtalinaeden ti kontrol iti Middle East. Dagiti naokupar a teritoryo ti Israel ket agserserbi kas dakkel nga estratehiko a base-militar tapno lipiten dagiti pagilyan nga Arabo ken kontrolen dagiti gameng, partikular ti langis ken dagiti dalan ti komersyo.