Kadagiti napalabas a lawas, iti panangidaulo ti Bagong Alyansang Makabayan (Bayan) ket tuloy-tuloy ti protesta dagiti progresibo a grupo tapno iyawag ti naanep a panangusig ken panagpasungbat ken bise presidente Sara Duterte. Naggunayen ti reklamo nga impeachment laban ken Duterte manipud idi ibotos ti mayorya ti Konggreso tapno mai-impeach isuna agingga iti panagtitipon dagiti senador tapno buklen ti maysa nga impeachment court.

Idi Mayo 11, iti botos a 257-25 ket na-impeach wenno insaklang ti Konggreso ni Duterte iti maikadwa a gundaway kadagiti kaso a betrayal of public trust, korapsyon, panagpasuksok ken nakaro a panagpangta. Pimmasa ti impeachment iti laksid ti panagpangta ti bunggoy a Duterte, babaen ti partido a PDP Laban, laban kadagiti mammanday-linteg.

Idi Mayo 18, binukel dagiti senador ti impeachment court a mangusig ken Duterte. Inyuna daytoy ti baro a nabotosan a Senate President a ni Alan Peter Cayetano, mabigbig a maka-Duterte. Pormal met a nairehistro iti impeachment court ti nagan ti 11-katao a taga-usig ti Konggreso.

Idi Mayo 11, agsasaruno dagiti tignay dagiti nailyan-demokratiko nga organisasyon tapno iduron ti panangusig ken Duterte. Malaksid iti Metro Manila, naangay met dagiti protesta kadagiti syudad ti Baguio, Cebu, Iloilo ken Davao.