Nagpahigayon og kalihukan ang mga mag-uuma, mananagat, ug lumad sa nagkalain-laing bahin sa nasud alang sa ilang katungod sa yuta, panginabuhian, ug pinuy-anan batok sa lokal ug langyaw nga mga korporasyan ug atubangan sa pagpasagad ug pasismo sa rehimeng Marcos.

Sa Benguet, nagpahigayon og prayer vigil ang mga porter, manindahay, ug residente sa La Trinidad Vegetable Trading Post niadtong Mayo 13 aron kundenahon ang pag-import sa Department of Agriculture og karot. Gipahibalo sa departamento ang plano niini nga mag-import og 6,000 metriko tonelada nga karot para sa Abril, Mayo, ug Hunyo aron matubag ang giingong kakulang sa suplay ug ipakunhod ang presyo sa merkado.

Sa Isabela, pipila ka mag-uuma gikan sa lain-laing lungsod sa probinsya ang nagtapok sa asembliya sa Danggayan Dagiti Mannalon ti Isabela (Dagami) ug nagmartsa sa Santiago City niadtong Mayo 11 aron ipanawagan ang tinuod nga reporma sa yuta, suporta sa produksyon, ug pagpanalipod sa katungod sa mga mag-uuma. Sa asembliya, naghimo sila og usa ka tuig nga plano sa aksyon ug gipahibalo ang bag-ong napili nga mga opisyal ug mga lider nga magpalig-on sa organisasyon taliwala sa krisis sa kabanikanhan.

Sa Dagupan City, nagtapok ang mga gagmayng mananagat sa usa ka konsultasyon nga gipangulohan sa Pamalakaya niadtong Mayo 11 aron batukan ang komersyal nga pagpangisda sulod sa 15-kilometros nga katubigan sa munisipyo. Nabalaka silang modaghan ang mga dagkong barko sa Lingayen Gulf human sa desisyon sa Korte Suprema kaniadtong Disyembre 2024 nga nagtugot sa mga dagkong kompanya nga mangisda dinhi. Nagplano ang grupo nga magpahigayon og dayalogo sa BFAR Region 1 aron iduso ang pagprotekta sa ilang panginabuhian.

Sa Nueva Vizcaya, nagtukod og barikada ang mga residente sa barangay Pao, Benguet ug Kakidugen sa Kasibu niadtong Mayo 9 isip pagbatok sa proyektong eksplorasyon sa North Luzon Mineral Resources Corporation. Gitukod ang mga barikada aron babagan ang pagsulod sa mga suplay sa kompanya ug lana ug ang pagpagawas sa mga sampol nga minerales. Naglangkob og 4,456 ka ektarya nga yutang kabilin sa Bugkalot/Ilongot ang maong eksplorasyon alang sa pagmina sa bulawan ug tanso.

Sa Quezon City, nagbarikada ang mga residente ug mag-uuma sa Pook Malantik, Barangay UP Campus niadtong Mayo 20 aron pugngan ang pagsulod sa mga materyales alang sa pagtukod sa UP-DSHUD Housing Project nga kabahin sa giplanong UP SDG Wellness Park Project. Papahawaon sa konstruksyon sa Megawide Construction Corporation ang mga residente. Usa ka rali ang gipahigayon usab niadtong Mayo 12 sa silingang komunidad sa Pook Aguinaldo batok sa maong proyekto.

Sa Bukidnon, gikundena sa mga lumad nga Manobo ang pagkoral ug pagpangawkaw sa ilang yutang kabilin sa Green Arrow Agriventures Inc-Kennemer Foods International didto sa Don Carlos. Tumong sa kompanya nga palapdon ang ilang plantasyon sa saging sa maong gikawkaw nga yuta. Ang Support to Parcelization of Lands for Individual Titling (SPLIT) Project sa World Bank gigamit sa pagpangilog sa yutang kabilin.