Tanda ti baro a tukad ti panagirteng ti risiris ti agkakaribal a paksyon dagiti agar-ari a dasig a burukrata kapitalista ti agsasaruno ken agkakanaig a paspasamak daytoy napalabas a lawas: ti impeachment wenno panangisaklang ti Konggreso ken panagrugi ti panagdengngeg ti Senado, ti kudeta iti Senado kagiddan ti panagparang ni Sen. Bato dela Rosa, ken balbaliw a panagpukaw na tapno itarayan ti mandamyento de aresto ti International Criminal Court (ICC).

Nagbalin a kasla payaso ken sirkero dagiti pulitiko a nagtambli-tambling ken nagkillo-killo kadagiti napasamak a maniobra, kontra-maniobra ken dinnungpar. Kalpasan ti innem a bulan a panaglemlemmeng, bigla a nagpakita ni Sen. dela Rosa tapno makabukel ti baro a mayorya ken mangipatugaw ti baro a liderato. Ngem iti sango ti pangta nga isuna ket matiliw ken maipan idiay The Hague, kalpasan a maipablaak iti publiko nga inruar ti ICC laban kenkwana, agdardaras a naglemmeng manen iti sadinno nga abut.

Ti panagsukat ti liderato iti Senado ket mapapati a paset ti plano nga idiskaril ti panaglitis ken Sara Duterte. Ti bise presidente ket naisaklang iti panagwaldas iti ₱500 milyon a “confidential funds,” iti saan a maipalawag a panagdakkel ti personal a kinabaknang na ken dadduma pay a kaso. Dakkel a mayorya (257 boto) ti Konggreso ti pimmabor iti kaso nga impeachment maikadwa a daras iti unos ti nasurok laeng a makatawen. Saan a kas iti immuna, alisto tatta a binukel ti Senado ti korte a dumngeg ken Duterte, uray saan pay a nalawag nu sadinno nga agtungpal daytoy.

Sigurado nga agtuloy pay kadagiti sumaruno a lawas daytoy a risiris dagiti agbibinnusor a paksyon, ken sigurado nga uminget ken agturong iti baro a rinnupak iti masangwanan bayat nga umadani ti eleksyon 2028. Napinget ti panangiduron ti kampo ni Marcos ken nadumaduma a partido a mapadisi ni Sara Duterte manipud iti pwesto ken malapdan ti panagtaray na kas presidente.

Daytoy a susik dagiti Marcos ken Duterte ket sarming ti nainget ken masansan a naranggas a risiris dagiti agriribal a paksyon dagiti agar-ari a dasig—dagiti burukrata kapitalista nga agiinnuna iti panagpabaknang babaen ti bileg. Bumara a bumara daytoy a susik iti sango ti kumarkaro a panagsuwek ti ekonomya ti sistema a malakolonyal ken malapyudal.

Bumassit a bumassit ti ganansya iti poder a mabalin a natalna a pagbibingayan ken paglalanglangan dagiti burukrata kapitalista, isu a ti kinabukatot da iti kinabaknang ken bileg ket agturturong iti panagiinnagaw ken rinnupak. Apaman a makatugaw iti poder, agbabalubal da iti kapaspas ken kadakkel ti kurkurakuten iti kaban ti pagilyan, bayat nga agpipinnalaing da iti panagindadalus iti sango ti umili. Ad-adda nga agbalbalin a garapal ken dakdakkel ti korapsyon ken panagtakaw dagiti burukrata kapitalista.

Bayat nga agpappapas iti kinabaknang ken agiinnagaw iti poder dagiti burukrata kapitalista, ti nalawa a masa ti umili ket naidalupo met iti kinarigat ken iti inaldaw-aldaw a panagsapul tapno agbiag . Iti napalabas a dua a bulan, nangnayon iti padagsen iti umili ti tuloy-tuloy a ngumatngato a presyo ti taraon ken dagiti basaran a kasapulan ken singir kadagiti basaran a serbisyo. Kasaruno daytoy ti pananggubat ti US iti Iran a ginundawayan dagiti bukatot a kumpanya iti langis tapno patayoken ti presyo ti diesel ken gasolina ken dadduma pay a produkto a petrolyo (50-100% a nangatngato kumpara iti sumagmamano a pagilyan iti Southeast Asia). Manamnama a tuluy-tuloy pay a ngumato ti presyo kadagiti sumaruno a bulan.

Iti tengnga ti kinakurapay ken panagsaraaw ti tiyan ti umili, ad-adda a marubrubroban ti pungtot da iti rehimen US-Marcos ken kadagiti burukrata kapitalista nga awan garuden ti ar-aramiden da tapno maalay-ayan ti panagrigrigat, ket mangnaynayon pay iti bakbaklayen da. Kalpasan a makikumplot kadagiti kumpanya iti langis iti panagparigat iti umili, makapagura ti rehimen Marcos a pagbalbalinen daytoy nga agpalpalama ti umili a pagpilpilaen da iti pammarang a panangited ti ayuda ken bagas, nga umdas laeng iti mano nga aldaw.

Ad-adda a gumurgura ti umili a Pilipino iti rehimen US-Marcos ken kadagiti agar-ari a dasig iti sango ti kinaawan sungsungbatan dagiti kurakot a nagibulsa ti binilyon a piso kadagiti ubbaw ken palpak a proyekto a flood control a naibunannag manipud idi napalabas a tawen, karamanen kadagiti dadduma pay a dadakkel a kunniber iti gubyerno. Bayat a rabrabngisen daytoy ti karbengan ken pagimbagan ti umili a Pilipino, paspasurot ni Marcos kadagiti diktar ti amo daytoy nga imperyalista a US, iti plano a panangilukat ti 1,620-ektarya nga “economic security zone” idiay Pampanga ken Tarlac para iti ekslusibo nga usar dagiti kumpanya nga Amerikano.

Mangnaynayon pay iti pungtot da ti agtultuloy a panangimula ti rehimen Marcos ti kinaranggas laban iti umili nga agbarbaringkwas ken lumablaban para iti karbengan da. Nakasilpo daytoy iti panagsapsapul da ti hustisya para iti rinibo a biktima agpada iti gera kontra droga ken ti pangpulitika a represyon kadagiti organisasyon ti masa.

Iti sango ti krisis iti ekonomya, pumigpigsa ti pukkaw ti nalawa a masa para iti makabiag a sweldo, pagsapulan ken seguridad iti trabaho, reporma iti daga, panagbaba ti presyo dagiti gagatangen ken rolbak iti presyo ti langis, karbengan iti pabalay ken dadduma pay a nairut a demokratiko a kadawatan.

“Marcos Singiren, Duterte Pagsungbaten” ti agtultuloy a pukkaw ti umili. Kasilpo daytoy ti awag nga ituloy ti panangusig ken Sara Duterte tapno pagsungbaten iti krimen na. Nakasilpo met ti pukkaw nga arestaren ken usigen iti ICC ni Bato dela Rosa ken dadduma pay a kasabwat ni Rodrigo Duterte iti nadara a gera iti droga. Nakasilpo met ti pukkaw a pagsungbaten ni Marcos ken dagiti upisyal na iti binilyon a piso a naibulsa kadagiti proyekto a flood control ken dadduma pay a dadakkel a kunniber.

Palalo a dismayado ti umili iti garapal a panagpappapas ti sumagmamano iti bulok a gubyerno ken panagparigat iti nalawa a masa ti umili. Uray agriribal dagiti burukrata kapitalista, agkaykaysa da amin iti panangsalaknib iti sistema a mangparparigat iti umili.

Saan a mauma ti umili a singiren ken pagsungbaten dagiti burukrata kapitalista ken pasista iti krimen ken panangirurumen iti masa ti umili. Kasapulan nga ipakaammo iti umili nga awan ti manamnama da a naan-anay a hustisya iti sidong ti agar-ari a reaksyunaryo nga estado, a manipud sipud ket pagkamangan dagiti pasista ken agtatakaw iti kaban ti pagilyan.

Dakkel a karit kadagiti pwersa a nailyan-demokratiko a naanep nga aggawaing masa, tapno ingato ti kamulatan ken pannakaawat ti umili iti istorikal a panggimong a ramut ti korapsyon iti pagilyan. Saan nga aggudeng-gudeng ken ipan amin a kabaelan nga agpropaganda iti masa, buklen dagiti organisasyon ken papigsaen dagiti limed a rebolusyonaryo a tignay da. Papigsaen ti pukkaw a gibusan ti burukrata kapitalismo, imperyalismo ken pyudalismo ken iyabante ti nailyan demokratiko a panagbalbaliw.