Nagisayangkat ti nadumaduma a tukad ti sangsangkamaysa a tignay dagiti mangmangged ken unyon daytoy Mayo tapno ilaban ti karbengan ken pagimbagan da babaen ti collective bargaining agreement (CBA).

Iti Day 1 Craft Philippines Inc idiay Laguna, nagballigi ti nasurok dua a lawas a welga dagiti mangmangged kas pannakilaban para iti nainkalintegan a CBA. Nagun-od da ti kadawatan para iti nayon a sweldo ken dadduma pay a karbengan. Agar-aramid da ti nangangato a klase ti appan ti ikan.

Iti LBC Express Metro Manila, nagisumite dagiti mangmangged ti notice of strike iti tengnga ti pito a bulan a deadlock iti negosasyon para iti CBA. Barya a ₱32 nayon iti sweldo iti tallo a tawen ti diaya ti kapitalista, adayo iti panawagan a ₱72 a nayon. Binatikos da met ti kontraktwalisasyon kadagiti mangmangged a maar-aramat a taktika tapno dupraken ti unyon ken paidaman isuda ti karbengan.

Iti PLDT, nagmartsa dagiti superbisor ti kumpanya iti panangiyuna ti unyon a GUTS-PLDT idi Mayo 15 iti hedkwarters ti kumpanya idiay Makati City. Napasamak met dagiti tignay idiay Quezon City, Cebu City ken Davao City. Sungbat da daytoy iti kinaawan ti panaggunay ti negosasyon para iti 2026-2028 CBA. Kinundenar da ti taktika ti naigagara a panangitantan ken panangbarat ti maneydsment iti negosasyon.

Iti kumpanya ti barko a Philippine Span Asia Carrier Corp idiay Manila, nagpiket dagiti mangmangged tapno ipakita ti suporta iti unyon a dandani pito a bulanen a makinegnegosasyon para iti CBA. Idurduron da ti nayon a sweldo ken dadduma pay a karbengan.