Awan ressat nga iyar-aramid ti US dagiti operasyon militar iti Pilipinas iti linged ti dadakkel a war games. Iti panagleppas ti Balikatan 2026 idi Mayo 8, dagus a rinugyan daytoy ti Salaknib 2 a dinar-ayan ti 7,000 tropa karaman dagiti naggapu iti Japan, Australia ken New Zealand. Panggep daytoy a war games nga asaen dagiti tropa iti pannakigubat iti kundisyon a naisla-isla (arkipelago) ken kontra-gerilya. Nagleppas ti Salaknib 2 idi Mayo 20, ngem agtalinaed dagiti tropa ken ramit a naaramat ditoy para iti dadduma pay a war games agingga Hulyo.

Kangrunaan a napraktis iti Salaknib 2 ti Joint Pacific Multinational Readiness Center-Exportable. Tampok ditoy ti nasaknap nga operasyon a kombat, small unit tactics, dagiti pinagtipon a live fire exercise, panagraut iti rabii manipud iti tangatang, panagpaputok kadagiti misayl ken labanan iti kabakiran, amin kadagiti “reyalistiko a senaryo.” Kas iti Balikatan, adu kadagiti lokasyon nu sadinno a maiyaramid dagitoy ket ilemlemmeng ken ilimlimed da.

Panagpalawa kadagiti dual-use a pasilidad

Kagiddan dagiti war games ti panagpalawa ti US ti network dagiti sibilyan a pasilidad nga maaramat daytoy kadagiti militar a panggep. Kaudyan ti panangiggem daytoy iti proyekto a rehabilitasyon ti Sangley Point International Airport, maysa a sibilyan nga eropwerto idiay Cavite. Idi Mayo 12, inyanunsyo ti US Trade and Development Agency a pondoan daytoy ti maysa a panagadal tapno itransporma ti eropwerto iti dual-use wenno doble nga usar (sibilyan ken militar) a pasilidad. Kasosyo ti US ditoy ti Cavitex Holdings, Inc. ti pamilya Virata.

Kabayatanna, idi Mayo 1 ket nagturong dagiti upisyal ti rehimen Marcos idiay Jerusalem tapno makiinnareglo iti panagpuonan dagiti kumpanya nga Israeli iti “Golden Node” ti US idiay New Clark City, Pampanga. Daytoy a “Golden Node” ti maitakder nga “economic security zone” ti US nga agserbi a pabrika ti armas iti balangkas ti Pax Silica. Ti panagserrek ken panagraira ti puonan ken teknolohiya ti Israel ditoy ket direkta a mangiramraman iti rehimen Marcos iti makapapungtot a gera a henosidyo ken dagiti gera nga agresyon ti US ken Israel iti Palestine ken Middle East.