Dua a hors de combat manipud iti Negros Oriental ken Masbate ti naiyulat a natay bayat nga adda da iti kustodiya ti berdugo a militar. Daytoy ket nakaro a panaglabsing iti internasyunal a makatao a linteg.

Idi Abril 23, kinemmeg, tinortyur ken ingagara a pinatay ti 62nd IB ni Dino Pane (Ka Yulo), mannakigubat ti New People’s Army (NPA)-Central Negros idiay Sityo Nabuluan, Barangay Bucalan, Canlaon City, Negros Oriental. Ni Pane ket agpapaimbag iti sakit a pneumonia ken agsagsagaba ti sobra a nangato a gurigor ken panagkapsut. Saan nga armado isuna iti didiay a panawen.

Idiay Masbate, natay iti kustodiya ti 2nd IB ti hors de combat a ni Raul Luding Tolingin idi Mayo 14 gapu iti “komplikasyon ken dadduma pay a sagubanit.” Sugatan a natiliw ti militar ni Tolingin idi Mayo 10 idiay Barangay Miabas, Palanas kalpasan ti maysa a peke nga engkwentro. Nabayagen nga agsagsagaba iti diabetes, high blood ken rayuma ni Tolingin, ken agpapaagas bayat a makidagdagus iti maysa a balay iti nasao a barangay. Tallo nga aldaw nga inlemmeng isuna ti militar manipud iti pamilya na agingga a pimmusay.

Nairekord met iti dua a prubinsya dagiti kaso ti panagdangran, panaglipit ken pammutbuteng ti militar kadagiti mannalon idi Abril. Amin dagitoy ket nakabalangkas iti panangkamat ti militar iti hukbo ti umili.