Nagkakadwa idiay University of the Philippines (UP)-Diliman Theater Quezon City idi Mayo 11 ti nasurok-kumurang 2,000 kapamilya, gagayyem ken dagiti bisita tapno padayawan dagiti martir ti Toboso wenno mabigbig kas Negros 19. Dagiti martir ket bukbuklen ti siyam a saan nga armado nga indibidwal ken 10 a Nalabbaga a mannakigubat ti New People’s Army (NPA) a minasaker ti 79th IB idi Abril 19 idiay Barangay Salamanca, Toboso, Negros Occidental.

Ti programa ti parangal ket indaulwan ti UP Diliman University Student Council, Bagong Alyansang Makabayan (Bayan) ken Karapatan. Segun kadagiti organisador, insayangkat da ti taripnong tapno sangsangkamaysa da a bigbigen ti tured, laing ken ayat nga inpaay ti Negros 19 iti umili.

Ti parangal ket nagpaut ti nasurok dua nga oras a napunno kadagiti bitla, testimonya, bidyo ken dagiti pabuya kadagiti rebolusyonaryo a kankanta, daniw ken sala. Intampok da ditoy ti biag ti Negros 19 iti panagserbi iti masa ken ti saan a maatiw a panaglaban ti masa a Negrosanon iti tengnga ti agtultuloy a kinarigat, panaggundaway ken militarisasyon iti isla ti Negros.

Dimmar-ay ken nangted ti mensahe dagiti kakabagyan ken gagayem da Alano, Ledesma, Santuyo, Errol Wendel, Prijoles ken Sorem. Napunno kadagiti istorya ti biag, angaw ken ragragsak, militansya ken gumilgil-ayab nga apoy ti dangadang dagiti mensahe da.

Iti mensahe ti ina ni Alano a ni Shiela, inyebkas na ti namnama nga ituloy dagiti nabati a kakadwa ti arapaap ni Alano para iti umili. “Saan tayo a baybay-an a mabura isuna iti daytoy a lubong… Umaw-awagak, nga ituloy tayo ti laban a narugyan da. Gapu ta ammo tayo amin, dayta ti kayat da, panagbalbaliw ti sistema, matulungan dagiti nakurapay ti Negros,” kunana.

Nangidanon met ti maysa a mensahe ti pammadayaw ni Marco Valbuena, pangulo nga upisyal iti impormasyon ti Communist Party of the Philippines. “Pakadayawan ti Partido ken New People’s Army a nakalangen dagiti martir ken banwar ti Toboso iti dana ti nailyan-demokratiko rebolusyon iti atiddog wenno ababa a panawen. Isapata mi nga ikkan hustisya ti ipupusay da,” kunana.

Manipud iti daga a sinibugan ti dara da, rinibo pay nga annak ti umili ti tumaud, bumaringkwas, rumukwas ken dumalyasat iti atiddog ken nalikaw a dalan ti gubat ti umili agturong iti nalabbaga nga aldaw ti balligi,” pablaak ni Valbuena. Naggibus ti taripnong iti panagkanta iti Internasyunal.