Waray hunong an ginhihimo han US nga mga operasyon militar ha Pilipinas ha tahub han dagko nga war games. Ha paghuhuman han Balikatan 2026 hadton Mayo 8, layon hini nga gintikangan an Salaknib 2 nga mayda napartisipar nga 7,000 nga tropa, kaupod an tikang ha Japan, Australia ngan New Zealand. Katuyuanan hini nga war games an pahiaraon an mga tropa ha pakikigerra ha kondisyon nga muro-puro (archipelagic), ngan kontra-gerilya. Nahuman an Salaknib 2 hadton Mayo 20, kundi magpapabilin an mga tropa ngan higamit nga gin-gamit dinhi para ha iba pa nga war games tubtub Hulyo.

Prinsipal nga gintreyning ha Salaknib 2 an Joint Pacific Multinational Readiness Center-Exportable. Landaw dinhi an hiluagan nga pankombat nga operasyon, small unit tactics, gintig-ob nga mga live exercise, pag-atake ha gab-i tikang ha kahanginan, pagpapabuto han mga misayl, ngan agway ha kagugub-an, ngatanan ha mga “reyalistiko nga senaryo.” Kapareho ha Balikatan, damo ha mga lokasyon diin ginhihimo ini gintatago ngan ginsisikreto.

Pagpapahiluag han dual-use nga mga pasilidad

Kadungan han mga war games an pagpapahiluag han US han network han mga pansibilyan nga pasilidad nga magagamit hini ha mga panmilitar nga katuyuanan. Pinakaurhi an pagkuha hini ha proyekto nga rehabilitasyon han Sangley Point International Airport, usa nga pansibilyan nga erport ha Cavite. Hadton Mayo 12, igin-anunsyo han US Trade and Development Agency nga popondohan hini an usa nga pag-aram agud itransporma an erport ha dual-use o duhaan nga paggamit (sibilyan ngan militar) nga pasilidad. Kasosyo han US dinhi an Cavitex Holdings, Inc. han pamilya nga Virata.

Samtang, kinadto hadton Mayo 1 an mga upisyal han rehimen Marcos ha Jerusalem agud aregluhon an pamumuhunan han kompaniya han Israel nga “Golden Node” han US ha New Clark City, Pampanga. Ini nga “Golden Node” an igtitindog nga “economic security zone” han US nga magseserbe nga pabrika han armas ha balayan han Pax Silica. An pagsulod ngan pag-ungbaw han puhunan ngan teknolohiya han Israel dinhi direkta nga nagdadabi ha rehimen Marcos nga makangaralas nga gerra nga henosidyo ngan mga gerra nga agresyon han US ngan Israel ha Palestine ngan Middle East.