Ha nakalabay nga mga semana, ha pamumuno han Bagong Alyansang Makabayan (Bayan) dirudiretso an protesta han mga progresibo nga grupo agud ipanawagan an hag-id nga pagbista ngan pagpapabaton kan bise presidente Sara Duterte. Inunhan na an reklamo nga impeachment kontra kan Duterte tikang hin binotos an mayoriya han Kongreso agud ig-impeach hiya tubtub ha pagtitirok han mga senador agud bug-uson an usa nga impeachment court.

Hadton Mayo 11, ha botos nga 257-25 gin-impeach o ginkasuhan han Kongreso hi Dutere ha ikaduha nga higayon ha mga kaso nga betrayal of public trust, korapsyon, panhukip ngan grabe nga pananarhug. Pinasar an impeachment ha luyo han pananarhug han barkadahan nga Duterte, pinaagi han partido nga PDP Laban, kontra ha mga magbaralaud.

Hadton Mayo 18, ginbug-os han mga senador an impeachment court nga magbibista kan Duterte. Ginpangunahan ini han bag-o nga gin-eleher nga Senate President nga hi Alan Peter Cayetano, lanong nga maka-Duterte. Pormal na liwat nga iginrehistro ha impeachment court an ngaran han 11-katawo nga prosekyusyon han Kongreso.

Tikang Mayo 11, susrunod an mga paggios han mga nasyunal demokratiko nga organisasyon para iduso an pagbista kan Duterte. Lain ha Metro Manila, nagkamayda han mga protesta ha mga syudad han Baguio, Cebu, Iloilo ngan Davao.