Nag-urupod ha University of the Philippines (UP)-Diliman Theather ha Quezon City hadton Mayo 11 an sumobra-kumulang 2,000 nga kapamilya, kasama, sangkay, ngan mga bisita agud tagan pasidungog an mga martir han Toboso o kilalado komo Negros 19. An mga martir ginkokomponer han siyam nga diri armado nga indibidwal ngan 10 nga Pula nga mangaraway han Bagong Hukbong Bayan (BHB) nga ginmasaker han 79th IB hadton Abril 19 ha Barangay Salamanca, Toboso, Negros Occidental.

An programa han pagpapasidungog ginpangunahan han UP Diliman University Student Council, Bagong Alyansang Makabayan (Bayan) ngan Karapatan. Sigon ha mga organisador, iginlansar an katitirok para magkakaupod nga kilal-on an kaisog, kabaltok, ngan paghigugma nga iginhalad ha katawhan han bug-os nga Negros 19.

Masobra duha kaoras an ginlastar han pagpasidungog nga napuno han mga pahayag, mensahe, bidyo, ngan mga pagsundayag han rebolusyunaryo nga kanta, luwa ngan sayaw. Iginpalandaw hini an kinabuhi han paseserbe ha masa han Negros 19 ngan an diri napeperdi nga pag-ato han masa nga Negrosanon ha butnga han nagpapadayon nga kakurian, paniniyupi, ngan militarisasyon ha isla han Negros.

Tinambong ngan naghatag han mga mensahe ha pagpasidungog an mga kaurupdan ngan sangkay nira Alano, Ledesma, Santuyo, Errol Wendel, Prijoles ngan Sorem. Napuno han mga estorya han kinabuhi, entremis ngan kalipayan, militansya ngan naglalarab nga kalayo han pakigbisog an ira mga mensahe.

Ha mensahe han iroy ni Alano nga hi Shiela, nagpahayag hiya han paglaum nga igpapadayon han nahibilin nga mga kasama an hingyap ni Alano para ha nasud. “Ayaw naton pasagdi nga mapara hiya hini nga kalibutan… Nananawagan ako, nga igpdayon naton an pakigbisog nga natikangan nira. Tungod kay maaram kita ngatanan, ini an karuyag nira, pagbabag-o han sistema, mabuligan an mga kablas han Negros,” sering niya.

Nagpaabot naman han usa nga mensahe han pagpasidungog hi Marco Valbuena, puno nga upisyal ha impormasyon han Partido Komunista ng Pilipinas. “An Partido ngan han Bagong Hukbong Bayan napasidungog nga ha hilaba o halipot nga panahon, nakaupod an mga martir ngan bayani han Toboso ha dalan han nasyunal demokratiko nga rebolusyon. Saad namon nga hatagan hin hustisya an ira kamatayon,” sering niya.

“Tikang ha tuna nga ginsaribuhan han ira dugo, yukut-yukot pa han mga anak han katawhan an maturok, mabuhat, maalsa ngan mahasog ha hilaba ngan barubaliko nga dalan han gerra han katawhan ngadto ha mapula nga adlaw han kadaugan,” pahayag ni Valbuena. Nahuman an katitirok ha pagkanta han Internasyunal.