Duha nga hors de combat tikang ha Negros Oriental ngan Masbate an nahirepot nga napatay samtang aada ha kustodiya han berdugo nga militar nga grabe nga pagtalapas ha internasyunal nga makatawo nga balaud.

Hadton Abril 23, gindakop, gintortyur ngan tuyo nga ginpatay han 62nd IB hi Dino Pane (Ka Yulo), mangaraway han Bagong Hukbong Bayan (BHB)-Central Negros ha Sityo Nabuluan, Barangay Bucalan, Canlaon City, Negros Oriental. Hi Pane nagrerekober ha sakit nga pneumonia ngan naabat han sobra kahitaas nga hiragnat ngan panluluya. Diri hiya armado hiton nga panahon.

Ha Masbate, napatay ha kustodiya han 2nd IB an hors de combat nga hi Raul Luding Tolingin hadton Mayo 14 tungod ha “komplikasyon ngan iba pa nga sakit.” Samaran nga nadakop han militar hi Tolingin hadton Mayo 10 ha Barangay Miabas, Palanas kasunod han usa nga pasalida nga engkwentro. Maiha na nga mayda sakit nga diabetes, high blood ngan rayuma hi Tolingin, ngan nagpapatambal samtang naukoy ha usa nga balay ha nasering nga barangay. Tulo kaadlaw hiya nga igintago han militar tikang ha iya pamilya tubtub nga namatay.

Nahilista liwat ha duha nga prubinsya an mga kaso han pangastigo, pan-gigipit ngan panhadlok han militar ha mga parag-uma hadton Abril. Ini ngatanan nakabalayan ha paglanat han militar ha hukbo han katawhan.