Naglansar han magkalain-lain nga balitang han duruyog nga paggios an mga trabahador ngan unyon hini nga Mayo agud ipakigbisog an ira mga katungod ngan kaupayan pinaagi han collective bargaining agreement (CBA).

Ha Day 1 Craft Philippines Inc ha Laguna, nagmadinaugon an masobra duha kasemana nga welga han mga trabahador komo pakigbisog para ha makatadungan nga CBA. Nakab-ot nira an demanda para ha dugang nga suhol ngan iba pa nga katungod. Naghihimo hira han higtaas nga klase han paon ha isda.

Ha LBC Express Metro Manila, nagsubmiter an mga trabahador han notice of strike ha butnga han pito kabulan nga deadlock ha negosasyon para ha CBA. Sensilyo nga ₱32 nga dugang nga suhol ha tulo katuig an tanyag han kapitalista, hirayo ha panawagan nga ₱72 nga kadugangan. Ginsukna liwat nira an kontraktwalisasyon ha mga trabahador nga gin-gagamit nga taktika agud bungkagon an unyon ngan hikawan hira han katungod.

Ha PLDT, nagmartsa an mga superbisor han kompaniya ha pangunguna han unyon nga GUTS-PLDT hadton Mayo 15 ha hedkwarters han kompaniya ha Makati City. Nagkamayda liwat han mga paggios ha Quezon City, Cebu City ngan Davao City. Baton nira ini ha kawaray pag-unhan han negosasyon para ha 2026-2028 CBA. Ginkundenar nira an taktika han tuyo nga pag-delatar ngan pambabarat han maneydsment ha negosasyon.

Ha kompaniya han barko nga Philippine Span Asia Carrier Corp ha Manila, nagpiket an mga trabahador agud igpakita an suporta ha unyon nga haros pito kabulan na nga nakikignegosasyon para ha CBA. Iginpapasulong nira an dugang nga suhol ngan iba pa nga mga katungod.