Hadton Mayo 15, ginhandum han katawhan Palestino an ika-78 katuig nga anibersaryo han Al Nakba ha butnga han nagpapadayon nga gerra nga henosidyo han US-Israel. An Al Nakba (An Kataragman) an madugo nga pagpapalayas han mga Zionista nga grupo ha Palestine hadton 1948 agud tukuron an estado nga “Israel” ha duso han imperyo nga British.

Iginkokonsidera han katawhan Palestino an nagpapadayon nga henosidyo komo “bag-o ngan mas brutal nga balitang han Al Nakba.” Sugad han nakalabay, kalakip hini an tinagdamo nga panmasaker, pagpapagutom, panruba han mga balay ngan imprastraktura, ngan pwersahay nga pagpapalayas para hul-os nga paraon an tulin nga Palestino.

Tikang Oktubre 2023, ginpulbos han mga Zionista an bug-os nga Gaza gamit an mga bala ngan bomba nga ginhimo ngan ginhatag han US. Ha upisyal nga report, naabot na ha 75,000 an direkta nga ginpatay han pangatake, ngan gatus-gatos kayukot pa an diri direkta nga namatay ha kagutom, sakit, nalubong ha narumpag nga mga bilding ngan mga waray matad-an. Waray humunong an mga Zionista ha pangatake bisan kun nakigsarabot ini ha ukoy-bubto tikang Oktubre 2025.

Igintalaan han Zionista nga estado an panibag-o nga pangangagaw han tuna pinaagi han pagpintar han “yellow line” ha sakob han Gaza. Nagtindog ini han 13 nga bag-o nga panmilitar nga detatsment agud ipailarum ha kontrol hini an 53-58% han teritoryo. Ginlupgop hini an 50-60% han mga tuna nga umhanan samtang ginpriso an mga Palestino ha piguot nga sentro han ebakwasyon nga hirayo ha mga produktibo nga tuna ngan ira pakabuhian.

Kadungan han henosidyo ha Gaza, hinay-hinay nga ginlulupgop han Israel an bug-os nga West Bank ngan East Jerusalem. Kada adlaw, nahiaagum an mga Palestino dinhi han pan-gigipit, sarbeylans, ngan pagpapalayas. Ha katapusan han 2025, masobra 700,000 na nga Zionista nga dapon an naukoy ha masobra 250 nga iligal nga settlement ha sakob han nasering nga mga lugar.

Diri mapaperdi

Ha luyo han kamadarahug ngan teror han pananakop, madig-on an paninindugan han katawhan Palestino nga magpabilin ha ira nasud, sugad liwat an katungod han ngatanan nga napalayas nga bumalik ngan bawion an tuna ngan mga teritoryo nga gin-agaw ha ira. Katin an nakalabay nga masobra usa kasiglo han mga rebolusyon ngan pag-aalsa, diri hira natugot nga mahitabo an usa pa nga kataragman, o “Al Nakba 2.0.”

Tikang han iginlansar an Al Aqsa Flood, an armado nga pag-aalsa hadton Mayo 2023, utro nga napamatud-an an katukmaan han pakigbisog nga Palestino. Utro nga nabutang an ira makatadungan nga pag-ato ha mga sentro han mga internasyunal nga institusyon. Komo suporta, milyun-milyon an binuhos ha mga kakalsadahan han Europe, America, Africa ngan Asia. Ginkilala han kalibutan an pakigbisog komo pag-ato para ha katalwasan, hustisya, dungog, ngan para ha bug-os nga katawhan ngan diri sumpakiay la ha mga bawnderi, ngan diri gud kasumpay ha “pagdedepensa ha kalugaringon” han Israel.

Labaw dinhi, nabuksas an makarimadima nga mga krimen han Zionista nga Israel nga ha maiha nga panahon iginkokonsidera na nga “normal,” bisan han damo nga estado nga Arabo. Hul-os na nga natimpag an ilusyon han Israel komo “nalalain nga demokrasya” ha Middle East ngan nabuksas komo makabagong “Nazi” nga ginkakangalsan han bug-os nga kalibutan. Ginkilala an kagrabihon ngan kahiluagon han mga krimen ha gerra ngan katawhan hini ha International Court of Justice ngan International Criminal Court.

Ekspansyunismo ha duso han US

Lahos ha Palestine, ginsasakop liwat han mga Zionista an iba pa nga parte han Middle East ha ilarum han kampanya nga Greater Israel. Pinakakatuyuanan hini nga lupgupon an mga rikuhanon nga teritoryo ngan aragian tikang ha Salog nga Nile han Egypt tubtub ha Salog nga Euphrates ha Iraq.

Ha Lebanon, gintikangan hini an paglalatag han “yellow line” nga naabot hin 10 kakilometro ha sur nga parte kahuman hini waray hunong nga bombahon an lugar tikang Marso. Ha Syria, iligal nga ginsakop han Israel an Golan Heights tikang pa 1967. Ha luyo han mga resolusyon han United Nations nga nagmamando nga igbalik an teritoryo, dirudiretso an pagtitindog hini han iligal nga mga komunidad ngan industriya ha mga parte nga riko ha tubig ngan matambok an tuna.

Aada ha luyo hini nga mga agresyon an imperyalismo nga US, gamit an bilyun-bilyon nga panmilitar nga pondo ngan armas, agud igpabilin an kontrol ha Middle East. Nagserbe an gin-okuparan nga mga teritoryo han Israel komo dako nga estratehiko nga base militar para gipiton an mga nasud nga Arabo ngan kontrolon an mga natural nga karikuhan, partikukar an lana ngan mga aragian han komersyo.