Hiluagan nga ginkundenar han magkalain-lain nga organisasyon an pagkunsinte ngan pagdepensa han Senado kan Sen. Ronald “Bato” dela Rosa, kahuman han pag-atentar nga salawdan hiya han mandamyento de aresto nga iginsapubliko han International Criminal Court (ICC) dapit kulop hadton Mayo 11.

Nakasuhan hi dela Rosa komo “indirect co-perpetrator” ha mga krimen kontra ha bug-os nga katawhan han pagpatay, nga mayda kalabutan ha “war on drugs.” Lupgop hini an mga insidente han pagpatay giutan han Hulyo 3, 2016 tubtub Abril 2018, hadton hiya pa an hepe han Philippine National Police.

Linutaw hi “Bato” hiton nga adlaw para ha maniobra nga igbutang hi Cayetano komo bag-o nga presidente han Senado. Unom kabulan na hiya nga nagtinago ha kahadlok nga ipaaresto ngan dad-on ha The Netherlands.

Iginbutang hiya han Senado ha ilarum han protective custody agud maseguro nga diri hiya maaaresto. Hadton Mayo 13, naghimo han drama an mga kaalyado niya nga mga senador para makaeskapo hiya ngan bumalik ha pagtinago.

Hadton Mayo 20, nagpagawas an Korte Suprema han desisyon nga diniri nga paundangon an pagsalawad han mandamyento de aresto han ICC ha iya. Ha yana, iginkokondisera hiya nga pugante.