Tigaman han bag-o nga balitang han pagpintas han sumpakiay han magkakaribal nga paksyon han naghahadi nga klase han mga burukrata kapitalista an susrunod ngan magkasurumpay nga panhitabo hini nga naglabay nga semana: an impeachment o pagsang-at han kaso han Kongreso kontra kan Vice President Sara Duterte ngan pagtitikang han pagbista ha Senado, an kudeta ha Senado kadungan han paglutaw ni Sen. Bato dela Rosa, ngan utro niya nga pagkawara agud lumikay ha mandamyento de aresto han International Criminal Court (ICC).

Baga mga payaso ngan sirkero an mga pulitiko nga nagtarutambling ngan nagpabarubaliko ha nahitabo nga mga maniobra, kontra-maniobra ngan banggaay. Kahuman han unom kabulan nga pagtinago, tigda nga nagpakita hi Sen Bato dela Rosa agud makabug-os han bag-o nga mayoriya ngan magbutang han bag-o nga pamunuan. Kundi atubangan han hulga nga arestuhon ngan dad-on hiya ha The Hague, kahuman igsapubliko an mandamyento nga igin-gawas han ICC kontra ha iya, dagmit hiya nga utro nga nagtago ha kun diin nga taguan.

An pagbabag-o han liderato ha Senado gintutuohan nga kaparte han plano nga idiskaril an pagbista kan Sara Duterte. Ginkasuhan an bise presidente ha pagmalgastar ha ₱500 kamilyon nga “confidential funds,” ha diri mahieksplikar nga pagdako han iya personal nga karikuhan ngan iba pa nga kaso. Dako nga mayoriya (257 nga botos) han Kongreso an pinabor ha kaso nga impeachment, ikaduha nga beses ha sakob han masobra la usa katuig. Diri sugad han una, layon yana nga ginbug-os han Senado an korte nga magbibista kan Duterte, bisan kun waray pa kaklaruhan kun diin ini maabot.

Piho nga magpapadayon pa ha mga masunod nga semana an presente nga takna hini nga sumpakiay han mga nagriribalay nga paksyon, ngan piho nga mapintas ngan tikadto ha bag-o nga mga banggaay ha tidaraon samtang tikahirani an eleksyon 2028. Pursigido an pagduso han kampo ni Marcos ngan magkalain-lain nga partido nga mapatalsik hi Sara Duterte tikang ha pwesto ngan maulang an iya pagdalagan komo presidente.

Ini nga sumpakiay han mga Marcos ngan Duterte espiho han mapintas ngan uruunina madarahug nga sumpakiay han mga nagriribalay nga paksyon han mga naghahadi nga klase—mga burukrata kapitalista nga nag-uunahay ha pagpariko ha poder. Tikapaso ini nga sumpakiay atubangan han tikagrabe nga padarusdos han ekonomiya ngan sistema nga bagakolonyal ngan bagapyudal.

Mas natikaguti an ganansya ha poder nga poyde kalmado nga pagbahinon ngan magsaro an mga burukrata kapitalista, hinungdan nga nahingangadto ha pag-aagaway ngan banggaay an ira kahakugan para ha karikuhan ngan poder. Oras nga makalingkod ha poder, naglalamangan hira ha kadagmiton ngan kadakuon han ginkukurakot ha pondo han katawhan, samtang nag-iisan-isanay ha pagmamakamalimpyo ha atubangan han katawhan. Mas nagigin butaray ngan tinagdako an korapsyon ngan pandambong han mga burukrata kapitalista.

Samtang napatakas ha karikuhan ngan nag-aagaway ha poder an mga burukrata kapitalista, ludlod naman an hiluag nga masa han katawhan ha kakurian ngan ha matag-adlaw nga pagtrabaho agud mabuhi. Ha naglabay nga duha kabulan, dinugang ha pas-anon han katawhan an dirudiretso nga paghitaas han presyo han pagkaon ngan mga batakan nga panginahanglan ngan sukot ha mga batakan nga serbisyo. Kasunod ini han pan-gegerra han US ha Iran nga ginsisingabot han mga hakog nga kompaniya ha lana para pahitas-on an presyo han diesel ngan gasolina ngan iba pa nga produkto nga petrolyo (50-100% nga mas hitaas tanding ha pira nga nasud ha Southeast Asia). Ginlalauman nga dirudiretso pa nga mahitaas an presyo ha mga maabot nga bulan.

Ha butnga han kakablasan ngan kagutom han katawhan, dugang nga nasusunghan an ira kangalas ha rehimen US-Marcos ngan mga burukrata kapitalista nga waray na ngani ginhihimo para ibanan an ira kakurian, nadugang pa ha ira pas-anon. Kahuman makigkunsabuhay ha mga kompaniya han lana ha pagpapakuri ha katawhan, makangaralas an rehimen Marcos nga ginhihimo nga paraglimos an katawhan nga ginpapapila ha parayaw nga panhahatag han ayuda ngan bugas, nga sadang la para ha pira kaadlaw.

Dugang nga nangangalas an katawhan Pilipino ha rehimen US-Marcos ngan ha mga naghahadi nga klase atubangan han kawaray baratunon han mga kurakot nga nagbursa han bilyun-bilyon kapiso ha mga peke ngan palpak nga flood control nga proyekto nga nabuksas tikang hadton nakalabay nga tuig, hasta na ha iba nga dagko nga korapsyon ha gubyerno. Samtang gintatamas-tamasan an katungod ngan kaupayan han katawhan Pilipino, sunud-sunuran hi Marcos ha mga dikta han amo nga imperyalista nga US, ha plano nga pag-aabre han 1,620-kaektarya nga “economic security zone” ha Pampanga ngan Tarlac para ha ekslusibo nga gamit han mga kompaniya nga Amerikano.

Nadugang pa ha ira kangalas an padayon nga pagsasabrag han rehimen Marcos han kamadarahug kontra ha katawhan nga nabuhat ngan naato para ha ira mga katungod. Nakasumpay ini ha ira pagbiling han hustisya para ha yukut-yukot nga biktima ngaduha han gerra kontra druga ngan han pampulitika nga panmuypoy ha mga organisasyon masa.

Atubangan han krisis ha ekonomiya, dugang nga nagkukusog an guliat han hiluag nga masa para ha makaburuhi nga suhol, pakabuhian ngan seguridad ha trabaho, reporma ha tuna, paghimubo han presyo han mga papliton ngan rolbak ha presyo han lana, katungod ha pabalay, ngan iba nga mahugot nga demokratiko nga demanda.

“Marcos Sukton, Duterte Papagbatunon” an padayon nga guliat han katawhan. Kasumpay dinhi an panawagan nga ipadayon an pagbista kan Sara Duterte para papagbatunon hiya ha iya mga krimen. Nakasumpay liwat an guliat nga arestuhon ngan bistahon ha ICC hi Bato dela Rosa ngan iba pa nga kakunsabo ni Rodrigo Duterte ha madugo nga gerra ha druga. Nakakaw-it liwat an guliat nga papagbatunon hi Marcos ngan iya mga upisyal ha bilyun-bilyon kapiso nga iginbursa ha mga flood control nga proyekto ngan iba pa nga dagko nga korapsyon.

Sobra nga dismayado an katawhan ha butaray nga pagpatakas han pira ha dunot nga gubyerno ngan pagpapakuri han hiluag nga masa han katawhan. Nagriribalay man an mga burukrata kapitalista, nagkakaurusa hira ngatanan ha pagdepensa ha sistema nga nagpapakuri ha katawhan.

Diri nasusumo an katawhan nga sukton ngan papagbatunon an mga burukrata kapitalista ngan pasista ha ira mga krimen ngan pagpapakuri ha masa nga katawhan. Kinahanglan pursigido nga ipahibaro ha katawhan nga waray malalauman nga tinuod nga hustisya an katawhan ha ilarum han naghahadi nga reaksyunaryo nga estado, nga tikang ha katikangan, darangpan han mga pasista ngan parupangawat ha pondo han katawhan.

Dako nga ayat ha mga pwersa nga nasyunal-demokratiko nga pursigido nga magburuhaton masa, agud ig-isa an kapukawan ngan pagsantop han katawhan ha makasaysayan ngan pankatilingban nga gamot han korapsyon ha nasud. Ayaw pagruhaduha ngan bug-os-kusog nga magpropaganda ha masa, bug-uson an ira mga organisasyon, ngan pakusgon an ira sikreto nga rebolusyunaryo nga paggios. Pakusgon an guliat nga tapuson an burukrata kapitalismo, imperyalismo ngan pyudalismo, ngan ipasulong an nasyunal demokratiko nga pababag-o.