Timaan sa bag-ong ang-ang sa paggrabe sa panagbangi sa mga magkaribal nga paksyon sa nagharing hut-ong sa mga burukratang kapitalista ang sunud-sunod ug magkalambigit nga panghitabo niining milabayng semana: ang impeachment o pagsang-at og kaso sa Kongreso batok kang Vice President Sara Duterte ug ang pagsugod sa pagtaral sa Senado, ang kudeta sa Senado dungan sa paglutaw ni Sen. Bato dela Rosa, ug ang pagkahanaw pag-usab niya aron ikyasan ang mandamyento de aresto gikan sa International Criminal Court (ICC).

Daw mga payaso ug sirkero ang mga pulitiko nga nagpatambling-tambling ug nagpabali-baliko sa nahitabong mga maniobra, kontra-maniobra, ug panagbangi. Human sa unom ka bulan nga pagtago, kalit nga nagpakita si Sen. dela Rosa aron tibuk-on ang bag-ong mayorya ug ibutang sa poder ang bag-ong pangulohan. Apan sa atubangan sa hulga nga siya dakpon ug dad-on sa The Hague, human gipagula ang mandamyento gikan sa ICC batok kaniya, dali-dali siyang nagtago pag-usab sa kung asang lungag.

Ang pagbag-o sa liderato sa Senado gituohang kabahin sa plano nga iligas ang pagtaral kay Sara Duterte. Gisang-atan og kaso ang bise presidente tungod sa pag-usik-usik niya sa ₱500 milyon nga “confidential funds,” sa dili mapatin-aw nga pagdako sa iyang personal nga bahandi, ug uban pang mga kaso. Dakong mayorya (257 ka boto) sa Kongreso ang pabor sa kasong impeachment, sa ikaduhang higayon sulod lang sa kapin usa ka tuig. Dili sama sa una, abtik karon nga gitukod sa Senado ang korte nga motaral sa kaso ni Duterte, bisan wala pa’y katin-awan kung asa kini padulong.

Sigurado nga mopadayon pa sa umalabot nga mga semana ang kasamtangang yugto niining panagbangi sa mga nag-ilogay nga paksyon, ug siguradong mosamot ang kagrabihon ug mosangpot sa bag-ong mga panagbangi samtang nagkaduol ang eleksyong 2028. Kusog ang pagduso sa kampo ni Marcos ug sa nagkalain-laing partido nga mapalagpot si Sara Duterte gikan sa pwesto ug mababagan ang iyang pagdagan isip presidente.

Kining panagbangi sa mga Marcos ug Duterte salamin sa hait ug matag karon ug unya nga bangis o bayolenteng panagsangka sa mga nagkaribal nga paksyon sa mga nagharing hut-ong—mga burukratang kapitalista nga naglumba sa pagpaadunahan pinaagi sa gahum. Misamot kainit kining panagbingkil taliwala sa nagkagrabe nga krisis sa ekonomiya sa sistemang malakolonyal ug malapyudal.

Nagkagamay ang ganansya sa poder nga mahimong malinawong bahin-bahinan sa mga burukratang kapitalista, hinungdan nga misangpot sa inilogay ug panagbangi ang ilang kahakog sa bahandi ug gahum. Sa higayon nga makalingkod sa poder, naglumba sila sa gipaspason ug gidak-on sa pagpangawat sa bahandi sa nasud, samtang nagpaka-aron-ingnon nga limpyo sa atubangan sa katawhan. Misamot ang kawalay ulaw ug dinagkong korapsyon ug pagpangawkaw sa mga burukratang kapitalista.

Samtang nagpakabusog sa bahandi ug nag-inilogay sa poder ang mga burukratang kapitalista, naglunang ang lapad nga masa sa katawhan sa kawad-on ug sa matag adlaw nga pagpaningkamot aron mabuhi. Niining milabayng duha ka bulan, nadugangan ang palas-anon sa katawhan tungod sa walay hunong nga pagsaka sa presyo sa pagkaon, batakang panginahanglan, ug balayronon sa mga batakang serbisyo. Kasunod kini sa pagpanggera sa US sa Iran nga gipahimuslan sa mga hakog nga kumpanya sa lana aron ipasaka og maayo ang presyo sa diesel, gasolina, ug uban pang produktong petrolyo (50-100% nga mas taas itandi sa ubang nasud sa Southeast Asia). Gilauman nga magpadayon pa ang pagsaka sa presyo sa umalabot nga mga bulan.

Taliwala sa kalisdanan ug gutom sa katawhan, dugang midilaab ang ilang kasuko sa rehimeng US-Marcos ug sa mga burukratang kapitalista nga wala na gani’y gibuhat aron pakubsan ang ilang kalisdanan, midugang pa hinuon sa ilang palas-anon. Human makigkunsabo sa mga kumpanya sa lana sa nagpalisod sa katawhan, mabiay-biayon ang rehimeng Marcos sa paghimong daw makililimos ang katawhan nga gipalaray niini sa pakitang-tawo nga pagpanghatag og ayuda ug bugas, nga igo lang sa pipila ka adlaw.

Misamot ang kalagot sa katawhang Pilipino sa rehimeng US-Marcos ug sa mga nagharing hut-ong taliwala sa wala pay napanubag sa mga kurakot nga nagbulsa og binilyong piso gikan sa mga mini ug palpak nga proyektong flood control nga nabutyag sukad sa miaging tuig, apil na ang ubang dagkong kahiwian sa gubyerno. Samtang gitamas-tamasan ang katungod ug kaayohan sa katawhang Pilipino, nagpaitoy-itoyon si Marcos sa dikta sa iyang agalong imperyalistang US, sa plano nga pag-abli sa 1,620-ektaryas nga “economic security zone” sa Pampanga ug Tarlac para sa eksklusibong gamit sa mga kumpanyang Amerikano.

Nakadugang pa sa ilang kasuko ang padayon nga pagsabwag sa rehimeng Marcos sa kabangis batok sa katawhang nibarog ug nakigbisog alang sa ilang mga katungod. Sumpay kini sa ilang pagpangita og hustisya para sa linibong biktima pareho sa gera kontra droga ug sa pulitikal nga pagpamig-out sa mga organisasyong masa.

Atubangan sa krisis sa ekonomiya, nagkakusog ang singgit sa lapad nga masa alang sa makabuhi nga suhulan, trabaho ug seguridad sa trabaho, reporma sa yuta, pagpaubos sa presyo sa mga paliton ug rolbak sa presyo sa lana, katungod sa pabahay, ug uban pang dinalian nga demokratikong panginahanglan.

“Marcos Singilon, Duterte Panubagon” ang padayon nga singgit sa katawhan. Sumpay niini ang panawagan nga ipadayon ang pagtaral kay Sara Duterte aron panubagon siya sa iyang mga krimen. Sumpay usab ang awhag nga arestuhon ug taralon sa ICC si Bato dela Rosa ug uban pang kakuntsaba ni Rodrigo Duterte sa maduguong gera sa droga. Sumpay usab niini ang singgit nga panubagon si Marcos ug iyang mga upisyal sa binilyong pisong gibulsa sa mga proyektong flood control ug uban pang dagkong anomalya.

Hilabihan kadismayado ang katawhan sa walay kaulaw nga pagpatibusog sa pipila diha sa dunot nga gubyerno ug pagpaantus sa lapad nga masa sa katawhan. Nag-inilogay man ang mga burukratang kapitalista, nagkahiusa silang tanan sa pagpanalipod sa sistemang nagpaantus sa katawhan.

Dili masumhan ang katawhan sa pagpaningil ug pagpanubag sa mga burukratang kapitalista ug pasista sa ilang mga krimen ug pagpaantus sa masa sa katawhan. Angayng tumang ipasabot sa katawhan nga dili makab-ot ang hingpit nga hustisya sa nasud ilalom sa nagharing reaksyunaryong estado, nga sukad sa sinugdanan, mao ang dalangpanan sa mga pasista ug kawatan sa bahandi sa nasud.

Dakong hagit sa mga pwersang pambansa-demokratiko nga makugihong maggimbuhatong masa aron ipataas ang kahimatngon ug pagsabot sa katawhan bahin sa makasaysayanon ug katilingbanong gamot sa korapsyon sa nasud. Dili maglangay-langay ug tumang magpropaganda sa masa, itukod ang ilang mga organisasyon, ug pakusgon ang ilang tago nga rebolusyonaryong paglihok. Pakusgon ang singgit nga tapuson ang burukratang kapitalismo, imperyalismo ug pyudalismo, ug i-asdang ang pambansa-demokratikong kausaban.