Kapin usa na ka bulan nga wala’y naagumang hustisya ang pamilya ug mga paryente sa mag-uumang T’boli nga si Jonathan Kubot sukad siya gipatay sa mga sundalo sa 105th IB. Gipatay siya sa militar niadtong Marso 25 sa Sityo Lam-afus, Barangay Lambangan, T’boli, South Cotabato.

Sumala sa taho, bag-o lang nahuman ni Kubot ang pagpanglimpyo sa mga humayan dihang nakita siya sa mga sundalo. Ila siyang gikuha, gitortyur, ug gipugos nga moangkon nga siya usa ka manggugubat sa Bagong Hukbong Bayan (BHB). Gipatay siya human wala’y nakuhang impormasyon gikan kaniya.   

Samtang, nakagawas niadtong Mayo 9 ang duha ka Dumagat nga politikal nga binilanggo nga silang Rocky Torres ug Abelardo “Dandoy” Avellaneda human ang halos walo ka tuig nga detensyon. Gibasura sa korte ang tinumo-tumo nga kasong pagpatay ug illegal possession of firearms and explosives batok kanila.

Gidakop sila sa militar niadtong Mayo 14, 2018 sa General Nakar, Quezon, human sa engkwentro sa BHB. Samtang napriso, nag-antos ang duha sa grabeng tortyur, pisikal nga pagpasakit, ug nagkadaot nga panglawas.