Kaylap nga gikundena sa nagkadaiyang organisasyon ang pagkunsinti ug pagpanalipod sa Senado kang Sen. Ronald “Bato” dela Rosa, human sa pagsulay nga pagserbi kaniya og mandamyento de aresto nga gipahibalo sa publiko sa International Criminal Court (ICC) sa hapon niadtong Mayo 11.

Gikasohan si dela Rosa isip “indirect co-perpetrator” sa mga krimen batok sa katawhan pinaagi sa pagpamatay, nga may kalambigitan sa “war on drugs.” Sakop niini ang mga insidente sa pagpamatay tali sa Hulyo 3, 2016 ug Abril 2018, sa panahon nga siya pa ang hepe sa Philippine National Police.

Mitungha si “Bato” niadtong adlawa alang sa maniobra nga ilingkod si Cayetano isip bag-ong presidente sa Senado. Unom ka bulan siyang nagtago-tago tungod sa kahadlok nga dakpon ug dad-on sa The Netherlands. Gipailalom siya sa Senado sa protective custody aron masiguro nga dili siya maaresto. Niadtong Mayo 13, naghimo og drama ang iyang mga kaalyado nga senador aron makaikyas siya ug makatago na usab.

Niadtong Mayo 20, nagpagawas ang Korte Suprema og desisyon nga nagdumili sa pagpahunong sa pagserbi sa mandamyento de aresto sa ICC batok kaniya. Sa pagkakaron, giila na siya nga usa ka pugante.