Naglunsad og nagkadaiyang ang-ang sa hiniusang lihok ang mga mamumuo ug unyon niining Mayo aron ipakigbisog ang ilang mga katungod ug kaayohan pinaagi sa collective bargaining agreement (CBA).

Sa Day 1 Craft Philippines Inc sa Laguna, nagmalampuson ang kapin duha ka semana nga welga sa mga mamumuo isip pagpakigbisog alang sa makiangayong CBA. Nakab-ot nila ang hangyo alang sa dugang sa suholan ug uban pang katungod. Nagahimo sila og de-kalidad nga mga paon sa isda.

Sa LBC Express Metro Manila, nagsumite ang mga mamumuo og notice of strike taliwala sa pito ka bulan nga dedlak sa negosasyon alang sa CBA. Sinsilyong ₱32 nga dugang sa suholan sulod sa tulo ka tuig ang tanyag sa kapitalista, layo ra sa panawagang idugang nga ₱72. Gimakmak usab nila ang kontraktwalisasyon sa mga mamumuo nga gigamit nga taktika aron gub-on ang unyon ug hikawan sila sa katungod.

Sa PLDT, nagmartsa ang mga superbisor sa kumpanya sa pagpanguna sa unyong GUTS-PLDT niadtong Mayo 15 sa hedkwarters sa kumpanya sa Makati City. Aduna usab mga lihok-protesta sa Quezon City, Cebu City ug Davao City. Tubag nila kini sa kakulangon sa pag-uswag sa negosasyon alang sa 2026-2028 CBA. Gikundena nila ang taktika sa tuyo nga paglangan-langan ug tanyag nga gamayng dugang-suholan sa maneydsment sa negosasyon.

Sa kumpanya sa barko nga Philippine Span Asia Carrier Corp sa Manila, nagpiket ang mga mamumuo aron ipakita ang suporta sa unyon nga hapit na pito ka bulan nga nakig-negosasyon alang sa CBA. Ginaduso nila ang dugang sa suholan ug uban pang mga katungod.