Mokabat sa 2,000 ka myembro sa pamilya, higala, ug mga bisita ang nagtapok sa University of the Philippines (UP)-Diliman Theater sa Quezon City niadtong Mayo 11 aron pasidunggan ang mga martir sa Toboso o giila nga Negros 19. Ang mga martir gilangkoban sa siyam ka dili armado nga indibidwal ug 10 ka Pulang manggugubat sa New People’s Army (NPA) nga gimasaker sa 79th IB niadtong Abril 19 sa Barangay Salamca, Toboso, Negros Occidental.

Ang programa sa pagparangal gipangunahan sa UP Diliman University Student Council, Bagong Alyansang Makabayan (Bayan) ug Karapatan. Matod sa mga organisador, gipahigayon ang maong panagtapok alang sa hiniusang pag-ila sa kaisog, kaalam, ug gugma sa Negros 19 nga gihalad sa katawhan.

Milungtad og kapin duha ka oras ang pasidungog nga napuno sa mga pamahayag, testimonya, bidyo, ug pasundayag sa mga rebolusyonaryong kanta, balak, ug sayaw. Ilang gipasiugda ang kinabuhi sa Negros 19 nga nag-alagad sa masa ug ang walay puas nga pagsukol sa masang Negrosanon taliwala sa nagpadayong kalisod, pagpahimulos, ug militarisasyon sa isla sa Negros.

Mitambong ug naghatag og mga mensahe sa pagpasidungog ang mga kabanay ug higala nilang Alano, Ledesma, Santuyo, Errol Wendel, Prijoles, ug Sorem. Napuno ang mga mensahe og mga istorya sa kinabuhi, komedya ug pangatawa, militansya, ug nagdilaab nga kalayo sa pakigbisog.

Sa mensahe sa inahan ni Alano nga si Sheila, mipadayag siya og paglaom nga ang nahabilin nga mga kauban magpadayon sa pangandoy ni Alano alang sa katawhan. “Dili nato tugotan nga mapapas siya dinhi sa kalibutan… Nanawagan ko, nga ipadayon nato ang pakigbisog nga ilang nasugdan. Tungod kabalo tang tanan, mao kini ang ilang gusto, kausaban sa sistema, matabangan ang mga kabus sa Negros,” matod pa niya.

Naghatag usab og usa ka mensahe sa pagpasidungog si Marco Valbuena, nangunang opisyal sa impormasyon sa Partido Komunista sa Pilipinas. “Ang Partido ug Bagong Hukbong Bayan nagpasidungog nga sa dugay o mubo nga panahon, nakahimamat ang mga martir ug bayani sa Toboso sa dalan sa nasudnon-demokratikong rebolusyon. Mopasalig kami nga mahatagan og hustisya ang ilang kamatayon,” ingon niya.

“Gikan sa yuta nga natubigan sa ilang dugo, liboan pa ka mga anak sa katawhan ang motungha, mobangon, makigbisog, ug mosubay sa taas ug liko-liko nga dalan sa gubat sa katawhan paingon sa pula nga adlaw sa kadaugan,” matod ni Valbuena. Gitapos ang panagtapok pinaagi sa pagkanta sa Internasyunal.