Niadtong Mayo 15, gihandom sa katawhang Palestino ang ika-78 ka tuig nga anibersaryo sa Al Nakba taliwala sa pintas nga gerang henosidyo sa US-Israel. Ang Al Nakba (Ang Katalagman) mao ang maduguong pagpalayas sa mga Zionistang pundok sa mga Palestino niadtong 1948 aron itukod ang estadong “Israel” sa pagduso sa imperyong British.

Giila sa katawhang Palestino ang kasamtangang henosidyo isip “bag-o ug mas brutal nga ang-ang sa Al Nakba.” Sama sa miagi, timaan niini ang dinaghang masaker, pagpanggutom, pagpangguba sa mga balay ug imprastruktura, ug pinugos nga pagpabakwit aron hingpit nga paphaon ang kaliwat nga Palestino.

Sukad Oktubre 2023, gipulbos sa mga Zionista ang tibuok Gaza gamit ang mga bala ug bombaang hinimo ug hinatag sa US. Sa upisyal nga taho, niabot na sa 75,000 ang direktang gipatay sa pagpanulong, ug gatusan ka libo pa ang dili direktang namatay sa gutom, sakit, nalubong sa nahugnong mga balay ug kadtong wala na makit-an. Wala mihunong ang mga Zionista sa pagpangatake bisan pa og nakig-areglo kini sa hunong-buto sukad Oktubre 2025.

Gitinguha sa Zionistang estado ang bag-ong pagpangilog og yuta pinaagi sa pagbadlis og “yellow line” sulod sa Gaza. Nagtukod kini og 13 ka bag-ong detatsment militar aron ipailalom sa kontrol niini ang 53-58% sa teritoryo. Gisakop niini ang 50-60% sa mga yutang umahan samtang gipriso ang mga Palestino sa huut nga mga sentro sa bakwitan nga layo sa mga yutang tabunok ug ilang pangabuhian.

Dungan sa henosidyo sa Gaza, hinay-hinay nga gisakop sa Israel ang tibuok West Bank ug East Jerusalem. Adlaw-adlaw, nakasinati ang mga Palestino dinhi og pagpanglupog, pagpaniid, ug pagpangabog. Sa katapusan sa 2025, kapin 700,000 ka Zionistang setler na ang namuyo sa kapin 250 ka iligal nga settlement sa sulod sa maong mga dapit.

Dili magpalupig

Taliwala sa kabangis ug makalilisang nga okupasyon, lig-on ang baruganan sa katawhang Palestino nga magpabilin sa ilang yuta, lakip sa katungod sa tanang gipahawa nga mobalik ug bawion ang yuta ug mga teritoryo nga giilog gikan kanila. Subay sa kasaysayan sa kapin usa ka siglo nga mga rebolusyon ug pag-alsa, wala sila misugot nga mahitabo ang lain na pud nga katalagman, o “Al Nakba 2.0.”

Sukad gilunsad ang Al Aqsa Flood, ang armadong pag-alsa niadtong 2023, subling napamatud-an ang kahusto sa pakigbisog sa mga Palestino. Subling nabutang ang ilang makatarunganong pagbatok sa sentro sa mga internasyunal nga institusyon. Isip suporta, minilyon ang nagmartsa sa kadalanan sa Europe, America, Africa ug Asia. Giila sa kalibutan ang pakigbisog isip alang sa kagawasan, hustisya, dungog, ug katawhan ug dili lang basta away sa mga utlanan, ug labawng dili kalambigit sa “pagpanalipod sa kaugalingon” sa Israel.

Labaw pa niini, naladlad ang makalilisang nga mga krimen sa Zionistang Israel nga sa taas nga panahon giisip na nga “normal,” bisan sa daghang estadong Arabo. Hingpit nga nahugno ang ilusyon sa Israel isip “bugtong demokrasya” sa Middle East ug naladlad isip bag-ong “Nazi” nga gikasilagan sa tibuok kalibutan. Giila ang kagrabihon ug gidaghanon sa mga krimen sa gubat ug sa katawhan niini sa International Court of Justice ug International Criminal Court.

Ekspansyunismo sa duso sa US

Lapas sa Palestine, ginapang- ilog usab sa mga Zionista ang ubang bahin sa Middle East ubos sa kampanyang Greater Israel. Pinakakatuyoan niini nga malangkob ang mga adunahang teritoryo ug agianan gikan sa Suba sa Nile sa Egypt hangtod sa Suba sa Euphrates sa Iraq.

Sa Lebanon, gisugdan niini ang pagbadlis sa “yellow line” nga moabot og 10 ka kilometro sa habagatang bahin human ang walay hunong nga pagpamomba sa dapit sukad Marso. Sa Syria, iligal nga giokupa sa Israel ang Golan Heights sukad pa niadtong 1967. Bisan pa adunay mga resolusyon sa United Nations nga nagmando nga iuli ang teritoryo, padayon ang pagtukod niini og mga iligal nga komunidad ug industriya sa mga bahin nga dagha’g tubig ug tabunok ang yuta.

Nagpaluyo niining mga agresyon ang imperyalismong US, gamit ang binilyong pundo sa militar ug armas, aron huptan ang kontrol sa Middle East. Nagsilbi ang giokupang mga teritoryo sa Israel isip dakong estratehikong base militar aron pig-oton ang mga nasud nga Arabo ug kontrolon ang mga natural nga kahinguhaan, partikular ang lana, ug mga agianan sa komersyo.