Walay hunong ang mga operasyong militar sa US sa Pilipinas sa takuban sa dagkong war games. Sa pagtapos sa Balikatan 2026 niadtong Mayo 8, gisugdan dayon niini ang Salaknib 2 nga adunay 7,000 ka tropa, lakip ang gikan sa Japan, Australia ug New Zealand. Katuyoan niini ang pagbansay sa mga tropa sa pakiggubat sa kahimtang nga kapupud-an (archipelagic), ug kontra-gerilya. Natapos ang Salaknib 2 niadtong Mayo 20, apan nagpabilin ang mga tropa ug kagamitan alang sa uban pang war games hangtud Hulyo.

Nag-unang gi-ensayo sa Salaknib 2 ang Joint Pacific Multinational Readiness Center-Exportable. Tataw dinhi ang malukpanong operasyong kombat, small unit tactics, hiniusang live fire exercise, pagpanulong sa gabii gikan sa kawanangan, pagpabuto og mga misayl, ug gubat sa lasang, tanan sa mga “reyalistikong senaryo.” Sama sa Balikatan, daghan sa mga lokasyon kung asa kini gilunsad sikreto ug ginatagoan.

Pagpalapad sa dual-use nga mga pasilidad

Dungan sa mga war games ang pagpalapad sa US sa network sa mga sibilyang pasilidad nga magamit niini sa mga katuyoang militar. Pinakaulahing nakuha niini ang proyektong rehabilitasyon sa Sangley Point International Airport sa Cavite. Niadtong Mayo 12, gipahibalo sa US Trade and Development Agency nga pagapondohan niini ang pagtuon aron himuong dual-use (sibilyan ug militar) ang maong landinganan. Katimbang sa US dinhi ang Cavitex Holdings, Inc. sa pamilyang Virata.

Samtang, miadto niadtong Mayo 1 ang mga upisyal sa rehimeng Marcos sa Jerusalem aron aregluhon ang pagpamuhunan sa mga kumpanyang Israeli sa “Golden Node” sa US sa New Clark City, Pampanga. Ang “Golden Node” mao ang pagatukurong “economic security zone” sa US nga magsilbing pabrika sa armas sa gambalay sa Pax Silica. Ang pagsulod sa puhunan ug teknolohiya sa Israel dinhi direktang naglambigit sa rehimeng Marcos sa makalilisang nga gerang henosidyo ug mga gera sa agresyon sa US ug Israel sa Palestine ug Middle East.