Sa nagligad nga mga semana, sa pagpamuno sang Bagong Alyansang Makabayan (Bayan) tayuyon ang protesta sang mga progresibo nga grupo agud ipanawagan ang maid-id nga pagbista kag pagpasabat kay bise presidente Sara Duterte. Nagaidog na ang reklamo nga impeachment batuk kay Duterte halin sang nagboto ang mayoriya sang Kongreso para i-impeach siya tubtob sa pagtipon sang mga senador para bug-oson ang impeachment court.

Sadtong Mayo 11, sa boto nga 257-25 na-impeach ukon ginkasuhan sang Manubo nga Panalgan si Duterte sa ikaduha nga higayon sa mga kaso nga betrayal of public trust, korapsyon, pagpanuhol kag grabe nga pagpamahog. Napasar ang impeachment sa pihak sang pagpamahog sang grupong Duterte, paagi sa partido nga PDP Laban, batuk sa mga tighimo sang layi.

Sadtong Mayo 18, ginbug-os sang mga senador ang impeachment court nga magabista kay Duterte. Ginapangunahan ini sang bag-ong pili nga Senate President nga si Alan Peter Cayetano, kilala nga maka-Duterte. Pormal naman nga ginrehistro sa impeachment court ang ngalan sang 11-tawo nga prosekusyon sang Manubo nga Panalgan.

Halin Mayo 11, sunod-sunod ang mga hublag sang mga pungsodnon-demokratiko nga organisasyon agud iduso ang pagbista kay Duterte. Magluwas sa Metro Manila, may mga protesta sa mga syudad sang Baguio, Cebu, Iloilo kag Davao.