Wala puas ang ginapatigayon sang US nga mga operasyon militar sa Pilipinas sa tabon sang mga dalagko nga war games. Sa pagtapos sang Balikatan 2026 sadtong Mayo 8, gilayon nga ginsugdan sini ang Salaknib 2 nga may partisipante nga 7,000 ka tropa, kaupod ang halin sa Japan, Australia kag New Zealand. Katuyuan sang war games nga ini ang hanason ang mga tropa sa pakig-away sa kondisyon nga isla-isla (archipelagic), kag kontra-gerilya. Natapos ang Salaknib 2 sadtong Mayo 20, apang magapabilin ang mga tropa kag kagamitan nga gingamit diri para sa iban pa nga war games tubtob Hulyo.

Nagapanguna nga ginahanas sa Salaknib 2 ang Joint Pacific Multinational Readiness Center-Exportable. Unod diri ang malaparan nga operasyon kombat, small unit tactics, gin-isa nga mga live fire exercise, pagsalakay sa gab-i halin sa kahawaan,pagpalupok sang mga misayl, kag awayan sa kagulangan, tanan sa mga “reyalistikong senaryo.” Kasubong sang Balikatan, madamo sa mga lokasyon kon diin ginapatigayon ang mga ini ginatago kag ginalikom.

Pagpalapad sang dual-use nga mga pasilidad

Kadungan sang mga war games ang pagpalapad sang US sang network sang mga sibilyan nga pasilidad nga magamit sini sa mga katuyuan militar. Pinakaulihi ang pagkamol sini sa proyektong rehabilitasyon sang Sangley Point International Airport, isa ka sibilyan nga paluparan sa Cavite. Sadtong Mayo 12, gin-anunsyo sang US Trade and Development Agency nga pondohan sini ang isa ka pagtuon para itransporma ang paluparan sa dual-use ukon duha kag gamit (sibilyan kag militar) nga pasilidad.Kasosyo sang US diri ang Cavitex Holdings, Inc. sang pamilya Virata.

Samtang, nagkadto sadtong Mayo 1 ang mga opisyal sang rehimen Marcos sa Jerusalem para aregluhon ang pagpangapital sang mga kumpaniyang Israeli sa “Golden Node” sang US sa New Clark City, Pampanga. Ang “Golden Node” nga ini ang itukod nga “economic security zone” sang US nga magaserbe nga pabrika sang armas sa balayon sang Pax Silica. Ang pagpasulod kag pagdominar sang pangapital kag teknolohiya sang Israel diri direkta nga naga-imbolbar sa rehimen Marcos sa makasuluka nga gyerang henosidyo kag mga gyerang agresyon sang US kag Israel sa Palestine kag Middle East.