Nag-ululupod sa University of the Philippines (UP)-Diliman Theater sa Quezon City sadtong Mayo 11 ang mas o menos 2,000 kapamilya, kaupod, abyan, kag mga bisita para hatagan sang pasidungog ang mga martir sang Toboso ukon kilala bilang Negros 19. Ang mga martir ginabug-os sang siyam ka indi armado nga indibidwal kag 10 ka Pulang hangaway sang Bagong Hukbong Bayan (BHB) nga ginmasaker sang 79th IB sadtong Abril 19 sa Barangay Salamanca, Toboso, Negros Occidental.

Ang programa sang pagpasidungog ginpangunahan sang UP Diliman University Student Council, Bagong Alyansang Makabayan (Bayan) kag Karapatan. Suno sa mga organisador, ginlunsar ang pagtililipon para magkaupod nga kilalahon ang kaisog, kaalam, kag pagpalangga nga ginhalad sa pumuluyo sang bug-os nga Negros 19.

Masobra duha ka oras ang ginlawig sang pasidungog nga napuno sang mga pamulong-pulong, testimonya, bidyo, kag mga pasundayag sang rebolusyonaryong ambahanon, binalaybay kag saot. Ginpaunod sang mga ini ang kabuhi sang pag-alagad sa masa sang Negros 19 kag ang indi malutos nga pakig-away sang masang Negrosanon sa tunga sang nagapadayon nga kaimolon, paghimulos, kag militarisasyon sa isla sang Negros.

Nagtambong kag naghatag sang mga mensahe sa pasidungog ang mga himata kag abyan nanday Alano, Ledesma, Santuyo, Errol Wendel, Prijoles kag Sorem. Napuno sang mga estorya sang kabuhi, lahog kag pagkinalipay, militansya kag nagadaba-daba nga kalayo sang paghimakas ang mga mensahe nila.

Sa mensahe sang iloy ni Alano nga si Shiela, nagpahayag siya sang paglaum nga padayunon sang mga nabilin nga mga kaupod ang handum ni Alano para sa pungsod. “Indi naton pagpabayaan nga mapanas siya sa kalibutan nga ini…Ako nagapanawagan, nga ipadayon naton ang away nga nasugdan nila. Tungod kahibalo kita tanan, ini ang gusto nila, pagbag-o sang sistema, mabuligan ang mga imol sang Negros,” suno sa iya.

Nagpaabot naman sang isa ka mensahe sang pasidungog si Marco Valbuena, lider opisyal sa impormasyon sang Partido Komunista ng Pilipinas. “Dungog sang Partido kag sang Bagong Hukbong Bayan nga sa malaba kag malip-ot nga panahon, nakaupod ang mga martir kag baganihan sang Toboso sa banas sang pungsodnon-demokratikong rebolusyon. Nagasumpa kami nga hatagan sang hustisya ang ila kamatayon,” suno sa iya.

“Halin sa duta nga ginbunyagan sang ila dugo, linibo pa nga mga anak sang banwa ang maga-usbong, magabangon, magarebolusyon kag magausoy sa malaba kag paliko-liko nga dalan sang inaway banwa padulong sa mapula nga adlaw sang kadalag-an,” pahayag ni Valbuena. Natapos ang pagtililipon sa pagkanta sang Internasyunal.