Sadtong Mayo 15, gindumdom sang pumuluyong Palestino ang ika-78 ka tuig nga anibersaryo sang Al Nakba sa tunga sang nagaragasa nga gyerang henosidyo sang US-Israel. Ang Al Nakba (Ang Kalamidad) ang maduguon nga pagpalayas sang mga Zionistang grupo sa Palestine sadtong 1948 para tukuron ang estado sang “Israel” sa duso sang imperyo nga British.

Ginakabig sang pumuluyong Palestino ang nagapadayon nga henosidyo bilang “bag-o kag mas brutal nga lebel sang Al Nakba.” Kasubong sang nagligad, may kinaiya ini sang madamuan nga pagmasaker, pagpanggutom, pagpangwasak sang mga balay kag imprastruktura, kag pwersa nga pagpalayas para lubos nga panason ang lahi nga Palestino.

Halin Oktobre 2023, ginpulbos sang mga Zionista ang bug-os nga Gaza gamit ang mga bala kag bomba nga himo kag hatag sang US. Sa opisyal nga lista, naglab-ot na sa 75,000 ang direkta nga ginpatay sang pagpangsalakay, kag ginatos ka libo pa ang indi direkta nga napatay sa gutom, balatian, nalubong sa narumpag nga mga bilding kag mga indi pa nakit-an. Wala nag-untat ang mga Zionista sa pagpang-atake bisan nakighisugot na ini sa untat-lupok halin Oktobre 2025.

Gintalana sang Zionistang estado ang panibag-o nga pagpang-agaw sang duta paagi sa pagkurit sang “yellow line” sa sulod sang Gaza. Nagtukod ini sang 13 ka bag-o nga detatsment militar agud ipaidalum sa kontrol sini ang 53-58% sang teritoryo. Ginsakop sini ang 50-60% sang mga duta nga ginaumhan samtang ginpriso ang mga Palestino sa mapiot nga sentro sang ebakwasyon nga malayo sa mga duta nga produktibo kag ila palangabuhian.

Kadungan sa henosidyo sa Gaza, amat-amat nga ginasakop sang Israel ang bug-os nga West Bank kag East Jerusalem. Adlaw-adlaw, nagaantus ang mga Palestino diri sang pagpang-ipit, pagbantay, kag pagpalayas. Sa katapusan sang 2025, masobra 700,000 Zionistang setler na ang nagapuyo sa masobra 250 ka iligal nga settlement sa sulod sang amo nga mga lugar.

Indi magpapigos

Sa pihak sang kapintas kag kugmat sang pagpanakop, malig-on ang panindugan sang pumuluyong Palestino nga magpabilin sa ila pungsod, subong man ang kinamatarung sang tanan nga napalayas nga magbalik kag bawion ang duta kag mga teritoryo nga gin-agaw sa ila. Bitbit ang nagligad nga masobra isa ka siglo sang mga rebolusyon kag pag-alsa, indi sila magpasugot nga mahitabo pa ang isa ka kalamidad, ukon “Al Nakba 2.0.”

Halin sang ginpatigayon ang Al Aqsa Flood, ang armado nga pag-alsa sadtong 2023, liwat nga napamatud-an ang kahustohon sang paghimakas Palestino.Liwat nga nabutang ang ila makatarungan nga pakig-away sa mga sentro sang mga institusyon internasyunal. Bilang suporta, minilyon ang nagdagsa sa mga kadalanan sang Europe, America, Africa kag Asia. Ginkilala sang kalibutan ang paghimakas bilang away para sa kahilwayan, hustisya, dignidad, kag katawhan sa kalibutan kag indi kagamo lang sa mga dulunan, kag labi nga indi kaangot sa “pagpangapin sa kaugalingon” sang Israel.

Labaw pa diri, nabuyagyag ang makangilidlis nga mga krimen sang Zionistang Israel nga sa madugay nga panahon ginakabig na nga “normal,” bisan sang madamo nga estadong Arabo. Lubos nga narumpag ang ilusyon sang Israel bilang “solo nga demokrasya” sa Middle East kag nabuyagyag bilang moderno nga “Nazi” nga ginakangil-aran sa bug-os nga kalibutan. Ginkilala ang kagrabehon kag kalaparon sang mga krimen sa sini sa inaway kag katawhan sa kalibutan sa International Court of Justice kag International Criminal Court.

Ekspansyunismo sa duso sang US

Labaw pa sa Palestine, ginsakop man sang mga Zionista ang iban pa nga bahin sang Middle East sa idalum sang kampanyang Greater Israel. Pinaka-katuyuan sini nga sakupon ang mga manggaranon nga mga teritoryo kag guluwaan halin sa Suba Nile sang Egypt tubtob sa Suba Euphrates sa Iraq.

Sa Lebanon, ginsugdan sini ang paglatag sang “yellow line” nga nagalab-ot na sa 10 kilometro sa sur nga bahin pagkatapos ang wala untat sini nga pagpangbomba sa lugar halin Marso. Sa Syria, iligal nga ginsakop sang Israel ang Golan Heights halin sang 1967. Sa pihak sang mga resolusyon sang United Nations nga nagamando nga ibalik ang teritoryo, tayuyon ang pagtukod sini sang iligal nga mga komunidad kag industriya sa mga bahin nga manggaran sa tubig kag matambok ang duta.

Yara sa likod sang mga agresyon nga ini ang imperyalismong US, gamit ang binilyon nga pondo militar kag armas, agud ipabilin ang kontrol sa Middle East. Nagaserbe ang gin-okupar nga mga teritoryo sang Israel bilang dako nga estratehikong base-militar para ipiton ang mga pungsod Arabo kag kontrolon ang mga duna nga manggad, partikular ang lana kag mga alagyan sang komersyo.