Lapnagon nga ginkundenar sang lain-lain nga organisasyon ang pagkunsinti kag pagpangapin sang Senado kay Sen. Ronald “Bato” dela Rosa, pagkatapos ang pagtilaw nga pagserbe sa iya sang mandamyento de aresto nga ginsapubliko sang International Criminal Court (ICC) hapon sadtong Mayo 11.

Naakusaran si dela Rosa bilang “indirect co-perpetrator” sa mga krimen batuk sa katawhan sa kalibutan sang pagpatay, nga may kaangot sa “war on drugs.” Sakop sini ang mga insidente sang pagpatay sang Hulyo 3, 2016 tubtob Abril 2018, sang siya ang hepe sang Philippine National Police.

Nagtuhaw si “Bato” sa adlaw nga ini para sa maniobra nga papungkuon si Cayetano bilang bag-o nga presidente sang Senado. Anum ka bulan na siya nga nagapanago sa kahadlok nga ipaaresto kag dal-on sa The Netherlands.

Ginbutang siya sa Senado sa idalum sang protective custody agud masegurado nga indi siya maaresto. Sadtong Mayo 13, nagtuga sang drama ang kaalyado niya nga mga senador agud makapalagyo siya kag makabalik panago.

Sadtong Mayo 20, nagpaguwa ang Korte Suprema sang desisyon nga nagapamalibad nga pauntaton ang pagserbe sang mandamyento de aresto sang ICC sa iya. Sa subong, ginakabig siya nga pugante.