Naglunsar sang lain-lain nga lebel sang ululupod nga paghulag ang mga mamumugon kag unyon sining Marso agud ipakigbato ang ila mga kinamatarung kag kaayuhan paagi sa collective bargaining agreement (CBA).

Sa Day 1 Craft Philippines Inc sa Laguna, nagmadinalag-on ang masobra duha ka semana nga welga sang mga mamumugon bilang pagpakigbato para sa makatarungan nga CBA. Naagum nila ang demanda para sa dugang nga sweldo kag iban pa nga kinamatarung. Nagahimo sila sang matag-as nga klase sang paon sa isda.

Sa LBC Express Metro Manila, nagsumiter ang mga mamumugon sang notice of strike sa tunga sang pito ka bulan nga deadlock sa negosasyon para sa CBA. Sensilyo nga ₱32 nga dugang sweldo sa tatlo ka tuig ang tanyag sang kapitalista, malayo sa panawagan nga ₱72 nga dugang. Ginbatikos man nila ang kontraktwalisasyon sa mga mamumugon nga ginagamit nga taktika para bungkagon ang unyon kag dingutan sila sang kinamatarung.

Sa PLDT, nagmartsa ang mga superbisor sang kumpaniya sa pagpanguna sang unyon nga GUTS-PLDT sadtong Mayo 15 sa hedkwarters sang kumpaniya sa Makati City. May mga aksyon man sa Quezon City, Cebu City kag Davao City. Sabat nila ini sa indi pag-idog sang negosasyon para sa 2026-2028 CBA. Ginkundenar nila ang taktika sang hungod nga pagpaatrasar kag pagpangbarat sang maneydsment sa negosasyon.

Sa kumpaniya sang barko nga Philippine Span Asia Carrier Corp sa Manila, nagpiket ang mga mamumugon para ipakita ang suporta sa unyon nga halos pito ka bulan na nga nagapakignegosasyon para sa CBA. Ginasulong nila ang dugang nga sweldo kag iban pa nga mga kinamatarung.