Nagtipon ang lain-lain nga grupo sa Welcome Rotunda sa Quezon City sadtong Mayo 15 bilang pagpakig-isa sa pagdumdom sang pumuluyong Pilipino sa ika-78 nga anibersaryo sang Al Nakba. Ginpanawagan nila ang paghilway sang Palestine halin sa mapintas nga okupasyon sang Zionistang Israel. Ginpangunahan ang hublag sang Philippines-Palestine Friendship Association. Bitbit sang mga nagprotesta ang mga bandera sang Palestine kag mga plakard nga nagapahayag sang suporta sa mga Palestino.

Palayason ang mga soldado nga Israeli. Nagpanawagan sang hustisya kag salabton ang mga residente sang General Luna sa Siargao Island sa Surigao del Norte pagkatapos sang serye sang mga krimen kag kalakasan batuk sa ila sang mga soldado nga Israeli nga nagdagsa sa isla. Nagtipon sa isa ka pagsinapol kaupod ang mga lokal nga opisyal, pulis, mga tag-iya sang negosyo kag iban pa nga sektor sadtong Mayo 12 agud talakayon ang sunod-sunod nga mga insidente sang kalakasan, pagpanggamo kag pagpangbastos sang mga soldado nga Israeli sa isla.

Pinakaulihi, kag pinakalala, ang pagpang-atake sang isa ka grupo nga mga Israeli sa Cartoon Cafe sa General Luna sadtong Mayo 11. Suno sa mga report, gin-initan sang mga soldado ang establisimento pagkatapos makita ang isa ka bandera sang Palestine nga nakasab-it sa guwa sini. Ginreport nga ginguba sang mga soldado ang mga CCTV camera kag pisikal nga ginkastigo ang magtiayon nga tag-iya sang negosyo, sa atubang sang ila gamay nga anak. Ang mga soldado nga ini nareport nga bag-ong guwa pa lang sa “serbisyo” sa gyerang henosidyo nga ginapatigayon sang Zionistang estado batuk sa Palestine.