Masobra isa ka bulan na nga wala makuha ang hustisya sang pamilya kag himata sang mangunguma nga T’boli nga si Jonathan Kubot halin sang patyon sang mga soldado sang 105th IB. Ginpatay siya sang militar sadtong Marso 25 sa Sityo Lam-afus, Barangay Lambangan, T’boli, South Cotabato.

Suno sa report, bag-o lang nakatapos maninlo sang humayan ni Kubot sang makita siya sang mga soldado. Ginkuha siya sang mga ini, ginpaidalum sa tortyur, kag ginpilit nga mag-ako nga siya hangaway sang Bagong Hukbong Bayan (BHB). Ginpatay siya sang wala sang makuha nga impormasyon halin sa iya.

Samtang, nahilway sadtong Mayo 9 ang duha ka Dumagat nga bilanggong pulitikal nga sanday Rocky Torres kag Abelardo “Dandoy” Avellaneda pagkatapos sang halos walo ka tuig nga detensyon. Ginbasura sang korte ang himo-himo nga mga kaso nga pagpatay kag illegal possession of firearms and explosives batuk sa ila.

Gindakop sila sang militar sadtong Mayo 18, 2018 sa General Nakar, Quezon, pagkatapos sang isa ka engkwentro sa BHB. Samtang nabilanggo, naka-agi ang duha sang grabe nga tortyur, pisikal nga pagpanakit, kag paglala sang ikaayong lawas.