Patimaan sang bag-o nga lebel sang pagsingki sang banggi-anay sang mga magkaribal nga paksyon sang nagahari nga sahi sang mga burukrata-kapitalista ang sunod-sunod kag magkaangot nga hitabo sining nagligad nga semana: ang impeachment ukon pag-akusar sang Manubo nga Panalgan batuk kay Vice President Sara Duterte kag pagsugod sang pagbista sa Senado, ang kudeta sa Senado kaupod ang pagtuhaw ni Sen. Bato dela Rosa, kag liwat niya nga pagkadula agud palagyuhan ang mandamyento de aresto sang International Criminal Court (ICC).

Daw mga clown kag sirkero ang mga pulitiko nga nagpatambling-tambling kag nagapabali-bali sa natabo nga mga maniobra, kontra-maniobra kag banggaan. Pagkatapos sang anum ka bulan nga pagpanago, gulpi nga nagpakita si Sen. dela Rosa agud mabug-os ang bag-o nga mayoriya kag magpapungko sang bag-o nga pamunuan. Apang sa atubang sang peligro nga siya dakpon kag dal-on sa The Hague, pagkatapos isapubliko ang madamyento nga ginpaguwa sang ICC batuk sa iya, dali-dali nga liwat siya nagpanago sa kon diin nga buho.

Ang pagbag-o sang liderato sa Senado ginapatihan nga kabahin sang plano nga idiskaril ang pagbista kay Sara Duterte. Ginkasuhan ang bise presidente sa pagwaldas sa ₱500 milyon “confidential funds,” sa indi mapaathag nga pagdako sang iya personal nga manggad kag iban pa nga kaso. Dako nga mayoriya (257 boto) sang Manubo nga Panalgan ang nagpabor sa kaso nga impeachment, ikaduha ka beses sa sulod sang masobra lang isa ka tuig. Indi kasubong sa una, madasig subong nga ginbug-os sang Senado ang korte nga magabista kay Duterte, bisan indi pa maathag kon diin ini padulong.

Segurado nga magapadayon pa sa mga maabot nga semana ang subong nga tsapter sang banggi-anay nga ini sang nga nagaribalan nga paksyon, kag segurado nga magasingki kag magapadulong sa bag-o nga banggaan sa palaabuton samtang nagahilapit ang eleksyon 2028. Pursigido ang pagduso sang kampong Marcos kag lain-lain nga partido nga mapalayas si Sara Duterte halin sa pwesto kag maupangan ang iya pagpadalagan bilang presidente.

Ang kagamo nga ini sang mga Marcos kag Duterte laragway sang masingki kag gulpi lang magtuhaw nga mapintas nga banggi-anay sang mga nagaribalan nga paksyon sang mga nagahari nga sahi – mga burukrata kapitalista nga nagapalumbaanay sa pagpamanggad sa gahum. Nagainit nga nagainit ang kagamo nga ini sa atubang sang malala nga pagsarurot sang ekonomiya sang sistema nga malakolonyal kag malapyudal.

Nagagamay nga nagagamay ang ganansya sa poder nga pwede malinong nga tunga-tungaon kag salo-saluhan sang mga burukrata kapitalista, rason nga nagapadulong sa pag-agaway kag banggaan ang ila kasakon para sa manggad kag gahum. Oras nga makapungko sa poder, nagapaindisanay sila sa kadasig kag kadako sang ginakurakot sa kaban sang banwa, samtang nagapaindisanay kon sin-o ang pinakamaayo sa pagpatinlo-tinlo sa atubang sang pumuluyo. Labi nga nangin barahubal kag dalagkuan ang korapsyon kag pagpangkawkaw sang mga burukrata kapitalista.

Samtang nagapagusa sa manggad kag naga-agaway sa poder ang mga burukrata kapitalista, lubong naman ang malapad nga masa sang pumuluyo sa kaimolon kag adlaw-adlaw nga pagkayod agud mabuhi. Sang nagligad nga duha ka bulan, nagdugang ang palas-anon sang pumuluyo kag tayuyon nga nagasaka ang presyo sang pagkaon kag mga sandigan nga kinahanglanon kag sukot sa mga sandigan nga serbisyo. Sunod ini sang pagpang-gyera sang US sa Iran nga ginahimuslan sang mga sakon nga kumpaniya sa lana agud patimbuokon ang presyo sang diesel kag gasolina kag iban pa nga produktong petrolyo (50-100% nga mas mataas kumparar sa pila ka pungsod sa Southeast Asia). Ginasigahum nga tayuyon pa nga magasaka ang presyo sa mga maabot nga binulan.

Sa tunga sang pag-antus kag pagraguok sang tiyan sang pumuluyo, labi nga nagakagatungan ang ila kaakig sa rehimen US-Marcos kag mga burukrata kapitalista nga wala na gani sang ginahimo para mabuhinan ang ila pag-antus, nagadugang pa sa ila palas-anon. Pagkatapos nga makigkunsabuhay sa mga kumpaniya sa lana sa pagpaantus sa pumuluyo, makasuluka ang rehimen Marcos nga ginahimo nga manugpakilimos ang pumuluyo nga nagapila sa pakitang-tawo nga pagpanghatag sang ayuda kag bugas, nga hustohan lang para sa pila ka adlaw.

Labi nga nagakangil-ad ang pumuluyong Pilipino sa rehimen US-Marcos kag sa mga nagahari nga sahi sa atubang sang kawala sang salabton sang mga kurakot nga nagabulsa sang binilyon ka piso sa mga peke kag palpak nga proyektong flood control nga nabuyagyag halin sang nagligad nga tuig, pati na sa iban nga mga dalagko nga anomaliya sa gobyerno. Samtang ginatampalas ang kinamatarung kag kaayuhan sang pumuluyong Pilipino, sunod-sunoran si Marcos sa mga dikta sang agalon nga imperyalistang US, sa plano nga pagbukas sang 1,620-ektarya nga “economic security zone” sa Pampanga kag Tarlac para sa ekslusibo nga gamit sang mga kumpaniya nga Amerikano.

Nagadugang pa sa ila kaakig ang padayon nga pagsabwag sang rehimen Marcos sang kalakasan batuk sa pumuluyo nga nagabangon kag nagapakig-away para sa ila mga kinamatarung. Kasugpon ini sa ila pagpangita sang hustisya para sa linibo nga biktima lunsay sang gyera kontra droga kag sang pangpulitika nga pagpangsumpo sa mga organisasyon masa.

Sa atubang sang krisis sa ekonomiya, labi nga nagabaskog ang singgit sang malapad nga masa para sa makabuhi nga sweldo, palangabuhian kag seguridad sa trabaho, reporma sa duta, pagpanubo sang presyo sang mga balaklon kag rolbak sa presyo sang lana, kinamatarung sa pabalay, kag iban pa nga labi nga kinahanglanon nga demokratikong demanda.

“Marcos sukton, Duterte Pasabton” ang padayon nga singgit sang pumuluyo. Kasugpon diri ang panawagan nga padayunon ang pagbista kay Sara Duterte para pasabton siya sa iya mga krimen. Kasugpon man ang singgit nga arestuhon kag bistahon sa ICC si Bato dela Rosa kag iban pa nga kahimbon ni Rodrigo Duterte sa maduguon nga gyera sa droga. Nakaangot man ang singgit nga pasabton si Marcos kag iya mga opisyal sa binilyon ka piso nga ginbulsa sa mga proyektong flood control kag iban pa nga mga dalagko nga anomaliya.

Tuman na ka dismayado ang pumuluyo sa barahubal nga pagpagusa sang pipila sa garuk nga gobyerno kag pagpaantus sang malapad nga masa sang pumuluyo. Nagaribalan man ang mga burukrata kapitalista, nagahiliusa sila tanan sa pagpangapin sa sistema nga nagapaantus sa pumuluyo.

Wala nagakataka ang pumuluyo nga sukton kag pasabton ang mga burukrata kapitalista kag pasista sa ila mga krimen kag pagpaantus sa masa sang pumuluyo. Dapat pursigido nga ipahibalo sa pumuluyo nga wala sang malauman nga himpit nga hustisya ang banwa sa idalum sang nagahari nga reaksyonaryong estado, nga halin pa sang una, pasilungan sang mga pasista kag kawatan sa kaban sang banwa.

Dako nga hangkat sa mga pwersang pungsodnon-demokratiko nga matutom nga nagahilikuton masa, agud ipasaka ang kamuklatan kag paghangup sang pumuluyo sa makasaysayan kag sosyal nga ugat sang korapsyon sa pungsod. Indi magtusik-tusik kag ubos kusog nga magpropaganda sa masa, bug-oson ang ila mga organisasyon, kag pabaskugon ang ila likom nga rebolusyonaryong paghulag. Pabaskugon ang singgit nga tapuson ang burukrata kapitalismo, imperyalismo kag pyudalismo, kag isulong ang pungsodnon demokratiko nga pagbag-o.