Duha ka hors de combat halin sa Negros Oriental kag Masbate ang ginreport nga napatay samtang yara sa kustodiya sang berdugo nga militar nga grabe nga paglapas sa internasyunal nga makatawo nga layi.

Sadtong Abril 23, gindakop, gintortyur kag hungod nga ginpatay sang 62nd IB si Dino Pane (Ka Yulo), hangaway sang Bagong Hukbong Bayan (BHB)-Central Negros sa Sityo Nabuluan, Barangay Bucalan, Canlaon City, Negros Oriental. Si Pane nagapaayo sa balatian nga pneumonia kag nagabatyag sang tuman ka taas nga hilanat kag pagpangluya. Indi siya armado sa panahon nga ini.

Sa Masbate, napatay sa kustodiya sang 2nd IB ang hors de combat nga si Raul Luding Tolingin sadtong Mayo 14 tungod sa “komplikasyon kag iban pa nga mga ginabatyag.” Pilason nga nadakop sang militar si Tolingin sadtong Mayo 10 sa Barangay Miabas, Palanas sunod sang isa ka himo-himo nga engkwentro. Madugay na nga nagabatyag sang balatian nga diabetes, high blood kag rayuma si Tolingin, kag nagapabulong samtang nagatener sa isa ka balay sa amo nga barangay. Tatlo ka adlaw siya nga gintago sang militar halin sa iya pamilya tubtob nga napatay.

Nalista man sa duha ka probinsya ang mga kaso sang pagpangkastigo, pagpang-ipit kag pagpanghadlok sang militar sa mga mangunguma sadtong Abril. Ang tanan nga ini yara sa balayon sa paglagas sang militar sa hukbo sang banwa.