Ginkantyawan sang rebolusyonaryong kahublagan sa Southern Tagalog ang deklarasyon nga Stable Internal Peace and Security (SIPS) sang rehimen Marcos kag Armed Forces of the Philippines (AFP) sa rehiyon sang Calabarzon (Cavite, Laguna, Batangas, Rizal kag Quezon) sadtong Hunyo 12. Deklarasyon sang AFP nga “malinong” kag wala na sang impluwensya sang rebolusyonaryong kahublagan sa rehiyon.

Suno kay Ka Cleo del Mundo, tagpamaba sang Bagong Hukbong Bayan (BHB)-Southern Tagalog (Melito Glor Command), nagadamgo nga nagamata ang rehimen US-Marcos sa deklarasyon nga ini. “Samtang nagapakuno-kuno nga wala na sang rebolusyonaryong pwersa sa Calabarzon, todo kag wala puas naman ang mga operasyon militar sa lain-lain nga bahin sini,” suno sa iya. Padayon kuno ang pagpanggamo sang mga pwersa sang Southern Luzon Command sang AFP kag 2nd ID sa mga kabukiran kag kaumahan.

Dugang ni del Mundo, ang “kalinong” nga luyag sang SIPS para sa mga imperyalista, mga dalagko nga negosyo kag korporasyon. Labi sila nga ginahatagan sang kahilwayan sang rehimen nga kawkawon ang dunang manggad, palayason ang mga mangunguma, baraton ang sweldo sang mga mamumugon sa uma kag dingutan sang serbisyo sosyal ang pumuluyo.

Kabahin man kuno ang deklarasyon bilang halad sa imperyalismong US sang katampad kag garantiya nga hilway nga gamiton ang rehiyon sa gyerang agresyon kag iban pa nga pang-ekonomiya nga interes sini. Mangin “hilway” na nga ipwesto sang mga imperyalista ang ila tropa diin man nga bahin sang rehiyon tungod “wala” na ang mga “upang.”

May bug-at ini ilabi na nga ang Calabarzon isa sa mga ginalunsaran sang Balikatan Exercises kag kabahin sang Luzon Economic Corridor nga magaserbe sa ginaluto nga imperyalistang gyera batuk sa China. Nagaplano pa ini nga magtukod sang paluparan sa Sangley Point, Cavite, nga may pangmilitar kag komersyal nga gamit.

Gani, suno kay del Mundo, samtang nagasingki ang pagpamigos kag paghimulos magapadayon ang pakigbato sang pumuluyo kag magapabilin sila nga magasandig sa rebolusyonaryong kahublagan, nga nakita nila nga bugtong nga kadampig sa atubang sini. “Indi bisan san-o man nadula ang hukbo sang banwa sa Southern Tagalog. Nakahanda ang mga yunit sang BHB sa idalum sang Melito Glor Command nga magpanikasog sa armadong rebolusyon kag dal-on ini tubtob sa kadalag-an,” suno sa iya.

Bilang pamatuod sang padayon nga pagpanikasog sang rebolusyonaryong kahublagan sa Calabarzon, nagpaguwa sang ila matag-pahayag ang mga yunit sang BHB halin sa Batangas, Rizal kag Quezon, kag ang National Democratic Front sa Cavite kag Laguna. Gindeklarar nila ang desisyon nga magpanikasog kag magsulong ilabi na sa espirito sang kahublagan panadlong.