Mga protestang mangunguma ang nagsug-alaw sadtong Hunyo 10 sa ika-38 nga tuig sang bangkarote nga Comprehensive Agrarian Reform Program (CARP). Gintawag nila ang programa nga ini bilang “pinakalawig, pinakamagasto kag pinakamaduguon nga peke nga reporma sa duta” nga ginpatuman sang reaksyonaryong estado.

Sa sulod sang apat ka dekada, wala ginbungkag sang programa ang monopolyo nga kontrol sang mga agalon mayduta kag kapitalista sa mga malagpad nga mga asyenda, plantasyon kag mga dalagko nga puna sang duta. Imbes, nagserbe ini nga instrumento sang mga dumuluong nga kumpaniya kag lokal nga agalon mayduta para palaparon ang ila mga plantasyon para sa mga tanum pang-eksport, proyektong real estate kag “pangkauswagan,” kag sining ulihi, mga proyekto para sa renewable energy sa mga duta pang-agrikultura.

Ginpalala pa ang kaayusan nga ini sang ginpatuman sang rehimen Marcos ang Support to Parcelization of Lands for Individual Titling ukon SPLIT sang World Bank. Katuyuan sini nga wasakon ang kolektibo nga pagpanag-iya sang mga asosasyon mangunguma sa mga parsela sang duta para himuon nga mas mahapos ang pagbaligya sang indibidwal nga mga parsela sa mga dumuluong nga kumpaniya. Gindungan diri ang ginatawag nga “Emancipation Act” para kuno sa “pagpatawad” sa mga utang sang mga mangunguma, para wala na sang bayaran ang mga magbakal.

Samtang ginadingot ang duta sa mga mangunguma, ginahimuslan sang mga dumuluong nga kumpaniya kag agalon mayduta ang barato nga kusog-pangabudlay sang minilyon ka mangunguma nga nagasulod sa mga indi regular nga mga trabaho para mabuhi. Ginaswelduhan sila sang mas manubo pa sa pungsodnon nga minimum, nga sobra ka layo sa makabuhi nga sweldo.

Isulong ang paghimakas para sa reporma sa duta

Kabaliskaran sa pagkabig sang CARP sa duta bilang baligya, ginakabig ini sang rebolusyonaryong kahublagan bilang kinamatarung sang mga nagabungkal. Nagapanguna nga demokratiko nga kaundan sang programa para sa demokratikong rebolusyon sang banwa ang pagpatuman sang handum sang mga mangunguma nga magpanag-iya sang duta nga ginabungkal, kag ang pagdula sang lain-lain nga dagway sang paghimulos pyudal kag malapyudal. Solo sa pagbag-o sa kaayusan sa kaumhan mabag-o ang malapyudal nga sistemang sosyal sa Pilipinas.

Sandig sa Rebolusyonaryong Giya sa Reporma sa Duta (RGRD) sang Partido Komunista sang Pilipinas, prinsipal nga katungdanan sang demokratikong gobyerno sang banwa nga “malab-ot ang handum nga ini paagi sa pagpatuman sang komprehensibong reporma sa duta.” Yara sa kaibuturan sini ang libre nga pagpanagtag sang duta sa mga imol kag manubo tubtob nahanunga nga mangunguma. Kaupod sini ang pagsulong sang programa sa pagbuligay sa produksyon kag pagpabaskog sang gahum pangpulitika sang mga mangunguma batuk sa mga nagahari nga sahi kag ila mga armadong gaway sa kaumhan.

Bisan indi maagum ang pungsodnon nga kadalag-an sang demokratikong rebolusyon sang banwa,ginapatuman sang Partido kag mga rebolusyonaryong pwersa ang RGRD, partikular na ang minimum nga programa sini nga pagpanubo sang arkila sa duta, pagdula sang usura, kag pagpasaka sang sweldo sang mga mamumugon sa uma. Ginapatuman man ang programa para ipasaka ang kita sang mga mangunguma kag ginasulong ang panawagan para sa pinakamaayo nga presyo sang ila mga produkto. Sa balayon sang RGRD, ginalunsar ang mga paghimakas kontra-pyudal agud maagum ang hustisya sosyal para sa minilyon nga mangunguma kag pahulagon sila para sa demokratikong rebolusyon sang banwa. Sa mismo higayon sang pagkapukan sang reaksyonaryong estado kag pagtukod sang demokratikong gobyerno sang banwa, ginapatuman ang maksimum nga programa sang libre nga pagpanagtag sang duta sa mga mangunguma nga nagabungkal.

Sentral nga katungdanan ang pagtukod kag pagpabaskog sang mga asosasyon mangunguma sa idalum sang Pambansang Katipunan ng mga Magbubukid (PKM). Sa amo sini, husto ang panawagan sang PKM para pabaskugon ang mga paghimakas kontra-pyudal, palaparon ang mga asosasyon masa sa kaumhan, tukuron ang linibo ka grupong pang-organisa, kag matutom nga ilunsar ang mga kampanyang masa kontra-pyudal, kontra-pasista kag kontra-imperyalista. Panawagan man sini ang pag-amot sang linibo ka Pulang hangaway sa Bagong Hukbong Bayan (BHB).

“Pinakataas nga dagway sang pakig-away sang masang mangunguma ang mismo pagbitbit sang armas,” siling sang PKM sa pahayag sini sadtong Hunyo 10. Suno diri, sa pagbaskog sang BHB sa mga larangan, sa mga duta nga may mga imperyalistang proyekto, kag mga ulumhan nga ginaagaw kag ginapalayas ang mga mangunguma, huluhalintang nga madugmok ang gahum pangpulitika kag pang-ekonomiya sang papet nga estado kag sang imperyalismong US.