Sang nagligad nga mga semana, nalista ang mga paglapas sa tawhanon nga kinamatarung batuk sa mga mangunguma, mangingisda kag pamatan-on estudyante sang mga elemento sang Armed Forces of the Philippines kag sang lokal nga gobyerno.

Demolisyon. Ginkundenar sang Pamalakaya-Cavite ang iligal nga pag-guba sang demolition team sang lokal nga gobyerno sang Bacoor City sa mga balay sang mga mangingisda sa Barangay Talaba 2 sadtong Hunyo 15. Wala sang dala nga dokumento ang mga tinawo, kundi “berbal nga mando” lang. Base sa dayalogo sang grupo kay Meyor Strike Revilla sadtong Mayo, dapat tubtob Hulyo pa magapabilin ang mga mangingisda, kag hatagan ang nagapanguna nga apektado sang fisherman’s dorm ukon puluy-an.

Sadtong Hunyo 1, pilit nga ginpalayas kag ginwasak sang mga tinawo sang Pieceland Corporation ang yara sa 14 ka nabilin nga balay sang mga tumandok nga Mangyan-Iraya sa Sitio Malatabako, Barangay San Vicente, Abra de Ilog, Occidental Mindoro. Natabo ang insidente pagkatapos magdesisyon ang Abra de Ilog Municipal Trial Court sadtong Abril 8 nga may kasal-anan sa kaso nga “other forms of trespass” (pagpasilabot) ang siyam ka tumandok nga Mangyan-Iraya.

Pag-abdak kag tortyur. Pilit nga gin-abdak sang mga nakasibilyan nga ahente sang 5th ID si Angel Lopez, konsehal sang UP Dilman University Student Council kag boluntir sang Youth Advocates for Climate Action Philippines sadtong Hunyo 13 samtang nagapatigayon sang kampanya sa impormasyon kag edukasyon sa Barangay Kakiduguen, Kasibu, Nueva Vizcaya. Sa kustodiya sang militar, ginpaidalum siya sa sikolohikal kag emosyonal nga tortyur. Yara siya sa lugar agud magbulig sa kampanya para sa mga komunidad nga maapektuhan sang operasyon sang North Luzon Mineral Resources Corporation. Nagakampo ang 86th IB sa barangay hall sang Kakiduguen nga nagaplano nga punggan ang pakig-away sang mga residente sa pagmina sa ila komunidad.

Militarisasyon. Halin Hunyo 7 tubtob sa subong, napaidalum sa militarisasyon sang 62nd IB ang mga komunidad sa Central Negros. Sadtong Hunyo 8, iligal nga ginpangbaluskay sang militar ang mga kabalayan sa mga sityo sang Punong, Nabakalan, Anahaw, Tribu, Laos, kag Agpapataw nga makita sa dulunan sang mga barangay Trinidad, Sandayao, kag Binobohan sa Guihulngan City, Negros Oriental. Samtang, nagakampo naman ang pila ka soldado sa Agogolo Elementary School sa Barangay Macagahay, Moises Padilla, Negros Occidental nga nagtuga sang kahadlok kag perwisyo sa mga manunudlo kag estudyante. Grabe man nga naapektuhan sini ang palangabuhian sang mga residente.