Masobra 100 ka adlaw halin sadtong Pebrero 28 sang sugdan sang imperyalismong US kag Zionistang estado sang Israel ang paglusob kag pila ka semana nga pagpangbomba sa pungsod Iran, ginpirmahan sang duha ka pungsod sadtong Hunyo 17 ang memorandum of understanding ukon “paghangpanay” pagkatapos ang masalimuot nga negosasyon sa Islamabad, Pakistan. Unod sang paghangpanay nga ini ang “ceasefire” u-kon untat-lupok sa sulod sang 60 ka adlaw para estoryahan ang mga detalye sang himuon nga pinal nga kasugtanan.

Ang kasugtanan nga ini ginsudlan sang US pagkatapos nga mapaslawan nga paluhuron ang Iran agud isungka ang iya lana kag sobereniya, kag ipaidalum ini sa iya dikta. Sa pihak sang mas superyor nga kusog militar kag pasulit-sulit nga deklarasyon sang kadalag-an sang buang nga presidente sini, napwersa ang US nga temporaryo nga iatras ang agresyon sa Iran, sa atubang sang madalum nga pangpulitika nga biak sa nagahari nga sahi sa US, kag mabaskog nga reklamo sang mga pumuluyo sa padayon nga nagabutyog nga presyo sang lana.

Pamatuod man ang kasugtanan sang ikasarang sang isa ka mas magamay kag mas mahuyang nga pungsod nga may sobereniya, nga pangapinan ang iya independensya batuk sa mas gamhanan nga imperyalista. Sa pihak sang patarasak nga pagpangbomba sang US kag Israel, nagpabilin nga determinado ang Iran nga pangapinan ang iya independensiya. Taliw-as sa damgo ni Trump kag Netanyahu nga maga-alsa ang pumuluyo batuk sa ila gobyerno, naghugpong ang bug-os nga Iran sa idalum sang bandera sang pungsodnon nga pagdepensa. Minilyon ang nagtipon sa mga kadalanan agud dululungan nga batikuson ang pagpangsalakay sa ila sang imperyalismong US.

Napirmahan man, nagapabilin sa bibi sang alanganin ang kasugtanan. Padayon ang pagpang-garit-garit kag pahayag ni Trump nga “mabalik sa gyera” kag ” hulugan sang bomba ang ila mga ulo” kon indi makuha ang gusto sa kasugtanan. Wala pa gihapon sang pugong ang pagpangbomba kag pagpang-agaw sang Israel sa teritoryo sang Lebanon. Nagapabilin ang mas o menos 20 ka base militar sini sa Kuwait, Qatar, Bahrain, United Arab Emirates (UAE), Saudi Arabia, Oman kag Iraq sa palibot sang Iran.

Samtang temporaryo nga gindulugan sang US ang agresyon sa Iran, padayon naman nga ginapasingki ang pagpasilabot sini sa Latin America. Pagkatapos lusubon ang Venezuela kag abdakon ang presidente sini nga si Nicolas Maduro kag asawa niya nga si Cilia Flores, wala untat ang pagdukdok sini sa gobyerno sang Venezuela para magsunod sa mga dikta sang US kag magserbe sa interes sang mga dalagko nga kapitalistang Amerikano, ilabi na ang mga dalagko nga kumpaniya sa lana.

Gingamit sini ang padihot nga “gyera kontra narkotiko” para hatagan rason ang pagpasilabot kag pagpamahog sa Mexico, Colombia, Guatemala kag iban pa nga pungsod. Padayon ang pagpangbomba sini sa mga magagmay nga salakyan pangdagat sa Caribbean, bisan wala sang pamatuod nga imbolbado ang mga ini sa droga. Padayon ang pagpang-ipit kag pagpamahog sini sa pungsod Cuba agud ipakakas ang kontrol kag pagplano sang estado sa ekonomiya, kag buksan ini sa pagsulod sang mga dumuluong nga mga dalagko nga bangko kag kapitalista. Ginasulsolan sini ang gobyerno sa Bolivia nga sumpuon ang pila ka semana na nga mga martsa kag pag-alsa sang minilyon ka anakbalhas batuk sa papet nga gobyerno kag plano nga pagsungka sang mga rekurso sang pungsod sa US. Direkta ini nga nagapasilabot para padaugon ang maka-US nga kandidato sini sa Colombia.

Padayon ang US sa pagpwesto sang pila ka puluan ka libo nga tropa, mga armas kag kagamitan pang-gyera kag pwersang nabal sa Pilipinas, sa Japan, South Korea kag iban pa nga pungsod sa Asia, agud “palibutan” kag “punggan ang pagbaskog” sang China. Sige ang sulsol kag suporta sa Japan agud magbaling sa militarismo kag pagtalikod sa kontra-gyera nga konstitusyon, nga ginsug-alagaw sang lapnagon nga protesta sang pumuluyo. Ginasulsolan man ang Taiwan nga magpabaskog sang militar kag maghanda “batuk sa agresyon.”

Tayuyon nga ginapabaskog sang US ang kontrol kag dominasyon sini sa Pilipinas. Asod-asod kag sampaw-sampaw ang ehersisyo militar indi lang sa norte sang Luzon, kundi tubtob sa Visayas kag Mindanao. Ginapatigayon subong sang AFP, sa duso sang US, ang ginatawag nga “territorial defense exercises” nga mga ehersisyo militar sa lain-lain nga isla, para tabunan ang pag-ensayo sang maniobra sang mga tropang Amerikano sa bug-os nga pungsod. Ginasugdan na sang US nga itukod ang tambakan sang lana (fuel depot) sa Davao Gulf, kag mga pasilidad sa Cebu kag Cagayan de Oro para sa pagkumpuni ukon dungkaan sang mga barkong nabal sini.

Sa tabon sang Salaknib Exercises, Kasangga kag mga kaangay sini, nagapasilabot ang militar sang US sa mga operasyon kontra-gerilya sa pungsod, sa dagway sang paghanas, pagpondo kag pag-armas sa AFP sa gyera batuk sa Bagong Hukbong Bayan. Sa Camarines Sur, nakita ang mga tropang Amerikano kag Australian nga kaupod sa mga operasyon sang AFP batuk sa masang mangunguma sa mga baryo.

Pursigido nga ginaduso sang US ang pagtukod sa Central Luzon sang 1,200-ektarya nga “economic security zone” sa balayon sang Pax Silica. Kabahin ini sang padihot sang US nga agawon ang eksklusibo nga kontrol sa mga nagapanguna nga ginakuhaan sang mga krusyal nga mineral para sa produksyon sang teknolohiya nga kinahanglanon para sa iya mga armas pang-gyera.

Sa atubang sang nagapadayon nga agresyon militar kag pang-ekonomiya sang imperyalismong US, dapat tayuyon nga pabaskugon kag palaparon ang paghiliusa sang pumuluyong Pilipino, para igiit ang independensiya sang pungsod kag pamatukan ang pagdalahig sa Pilipinas sa mga gyera nga ginasindihan sang US. Dapat batikuson kag pakig-awayan ang papet nga rehimen Marcos, labi na ang mga opisyal sini sa militar kag depensa nga mga ahente sang imperyalismong US kag numero uno nga traidor sa pungsod. Bulag sila nga tigsunod sa mga dikta sang agalon nga Amerikano kag kakunsabo sa pagpinagusto sang mga pwersang militar sang US sa Pilipinas, sa kahalitan sang palangabuhian kag kaluwasan sang pumuluyo, kag kahilwayan sang pungsod.

Padayon nga pabaskugon ang mga paghimakas masa batuk sa nagadako nga presensya militar sang US sa Pilipinas. Pabaskugon ang kahublagan edukasyon, propaganda kag pangkultura agud pamuklaton ang pumuluyong Pilipino, nga padayon nga ginabulag sa kamatuoran sang paghari kag pagpamigos sang imperyalismong US sa pungsod. Palaparon ang mga hublag sang pumuluyo batuk sa mga base kag pasilidad militar sang US, mga indi patas nga kasugtanan militar, mga pag-ensayo sa gyera, presensya sang mga tropang Amerikano, kag nakatambak nga mga kagamitan militar sang US sa pungsod.

Dapat pabaskugon ang rekrutment sa Bagong Hukbong Bayan bilang nagapanguna nga hinganiban sang pumuluyong Pilipino sa pagpakig-away sa pagpamigos sang imperyalismong US sa pungsod. Kaangay sa ginpakita sa kasaysayan, ang matuod nga pungsodnon nga kahilwayan maagum sa banas sang armadong rebolusyon. Samtang indi matuod nga nakaluwas ang Pilipinas sa kuko sang imperyalistang US, magapadayon ang pumuluyong Pilipino sa armadong rebolusyon agud lab-uton ang ginahandum nga kahilwayan sang pungsod.