Madinalag-on nga nahiwat sang grupo sa US nga Freedom Road Socialist Organization (FRSO) ang ila ika-10 nga Kongreso sadtong Mayo sa kritikal nga panahon nga nagauswag ang paghimakas sang pumuluyo kag nagadasig ang pagbulusok sang krisis sang monopolyo kapitalismo sa US. Nagpaabot sang pagpanamyaw sa kongreso sang FRSO ang Partido Komunista sang Pilipinas (PKP).

Ang FRSO isa ka pungsodnon nga organisasyon sang mga rebolusyonaryong nagahimakas para sa sosyalismo sa US. Suno sa grupo, halin sang ginlunsar sini ang ulihi nga kongreso sadtong 2022 may mga ekstra ordinaryo nga paglapad kag pagdamo sang katapuan sini sa mga syudad kag banwa. Nag-ululupod sa kongreso ang 185 ka delegado kag 101 ka alternatibo nga myembro sini, nga pinakadamo sa nagligad nga mga kongreso. Naghalin sila sa tanan nga estado sang US. Dako nga mayoriya sang mga delegado mas bata sa edad nga 35 anyos kag masobra 40% naghalin sa pigos nga mga nasyunalidad. Halos katunga naman sang bug-os nga kongreso mga babaye kag kabahin sang LGBTQ+.

Sang nagligad nga mga tuig, napamunuan sang FRSO ang pila ka mga protesta nga ginpakigbahinan sang ginatos ka libo nga pumuluyo kag lubos nga nangin isa ka pwersa sa kahublagan masa. Ginreport sang grupo ang pag-uswag sa mga hilikuton sa kahublagan pangabudlay, aktibo nga pagtukod sang mga pungsodnon nga kahublagan, kag pagpakig-isa sa mga internasyunal nga paghimakas kaangay sa Palestine kag Pilipinas. Nagpanikasog man ang bug-os nga katapuan sini para pakig-awayan ang reaksyonaryong mga atake ni Trump. “Nagasulong kita sa banas padulong sa katuyuan sang pagtukod sang bag-o nga partido komunista nga makahangkat sa gahum,” pahayag sang FRSO

“Ang inyo pagtililipon isa ka malahalon nga kadalag-an para sa sahing mamumugon kag tanan nga ginahimuslan kag pigos nga pumuluyo sa pusod sang imperyalistang demonyo,” pahayag sang PKP. Dugang sang Partido, mas nga napanahon ang kongreso ilabina kag tuman ka dasig nga nagasingki ang mga kontradiksyon sa US kag sa bug-os nga kalibutan.

“Nagatan-aw kami sa padayon nga ululupod nga magtuon kag maghimakas, para lab-uton ang labi pa nga mga kadalag-an para sa pumuluyo, kag para magmartsa nga ululupod sa pag-agum sang kahilwayan, hustisya, kag masanag nga sosyalistang palaabuton, kag labi nga mas nagasidlak nga komunistang buasdamlag,” suno sa PKP.