Nagpadangat han pakiduyog ha kasubo an Special Office for the Protection of Children (SOPC) han National Democratic Front of the Philippines (NDFP), ha mga pamilya, kaurupdan, kaklase, magturutdo, ngan mga komunidad nga naapektuhan han trahedya han panmusil ha eskoylahan ha Tacloban City hadton Hunyo 22. Sering hini, diri la ini trahedya han mga indibidwal kundi usa nga sintomas han usa nga nadudunot nga sistema.

Ginbubuksas han panmusil ha eskoylahan ha Tacloban an madarahug ngan mapanhibang nga kinaiya han katilingban nga Pilipino nga nagmomolde ha kinabuhi han kabataan nga Pilipino, sigon ha SOPC. Ha ilarum han presente nga sistema, nagin normal an kultura han kamadarahug ngan kawaray baratunon. Kada adlaw, testigos an mga bata ha grabe nga kakurian, pasismo han estado, korapsyon, ngan kawaray tinuod nga oportunidad para ha ira kabubwason. Ha sugad nga kamutangan, nagigin kaparte han panhunahuna han bata an kamadarahug.

Gintipahan han SOPC an mga pag-aatentar han reaksyunaryo nga gubyerno nga gamiton an trahedya agud ipasulong an mga kontra-bata nga palisiya. Sering hini, sayop nga gamiton nga rason ini nga trahedya agud pahimub-on an minimum age of criminal responsibility. An mga sugad nga proposisyon diri nabaton ha gamot han kamadarahug ngan pirit la nga iginpapaling an pagbasol ha mga bata mismo. An tinuod nga isyu an pagbubungkag ha kultura han kawaray baratunon nga ginpapabilin han naghahadi nga klase, ngan diri an mas mabug-at nga pagsirot ha mga bata.

Iginpasaro han NDFP nga ha mga rebolusyunaryo nga erya, aktibo nga nagpapatuman an mga organo han pampulitika nga poder (gubyerno han katawhan) han mga programa para ha kaupayan han bata. Kalakip dinhi an mga kampanya nga literasiya ngan edukasyon nga nakabasar ha kamutangan han ira mga komunidad. Katuyuanan hini nga moldehon an mga bata komo mga responsable nga kaapi han katilingban nga mayda hitaas nga pankatilingban nga kapukawan.

Pundamental ha panan-aw han NDFP an pagkilala nga nauswag an mga bata kun mayda poder an mga mga pamilya ngan komunidad, sering hini. An kawaray tuna, kawaray trabaho, himubo nga suhol, pwersahay nga migrasyon, ngan kawaray hin mga pankatilingban nga serbisyo an naghihibang ha kaupayan han mga bata. Ha sugad, an tinuod nga proteksyon ha bata diri mahihimulag ha pakigbisog para ha reporma ha tuna, nasyunal nga industriyalisasyon, soberaniya ha ekonomiya, ngan mga demokratiko nga katungod.