Upat katuig na an pag-inantos han katawhan Pilipino ha ilarum han niyutiyo, pakuri ngan pasista nga rehimen Marcos. Anuman nga pagpirit nga igladawan ni Ferdinand Marcos Jr nga “nauswag” na an Pilipinas, diri niya matatahuban an kamatuoran nga natikagrabe an kamutangan han nasud ngan katawhan Pilipino. Wala-tuo an deklarasyon han mga upisyal ni Marcos nga naperdi na an rebolusyunaryo nga armado nga pag-ato, kundi waray wantas pa gihapon an mga panmilitar nga operasyon ha tanan han prente gerilya ha bug-os nga nasud. Padayon nga ginsusunghan ni Marcos an kalayo han gerra han katawhan.

Natikagrabe gud an kamutangan han mga trabahador, parag-uma, parupangisda ngan iba pa nga batakan nga klase ngan sektor nga nagkokomponer han mayoriya han katawhan. Ha luyo nga gapil, an pipira nga naghahadi nga klase, kakunsabo an imperyalismo nga US, nabubusog ha karikuhan nga ginhahakin tikang ha pananalumpigos ngan paniniyupi ha masa nga anakbalhas, ha burukratiko nga korapsyon, pandambong ha natural nga karikuhan, ngan ha pangangagaw han tuna ngan pakabuhian. Aada ha peligro an katalwasan han bug-os nga nasud ha pagtugot ni Marcos nga gamiton han US an Pilipinas komo dako nga base militar.

Natikabagsak an panginabuhi han katawhan ha atubangan han tigda nga paghitaas han presyo han lana, pagkaon ngan mga matag-adlaw nga panginahanglan. Waray pulos an pakita-ha-tawo nga pitad ni Marcos, sugad han mga pabilib nga distribusyon han bugas ngan ayuda. An suhol han mga trabahador ngan sweldo han ordinaryo nga mga empleyado, waray pa ha katunga han balor agud mabuhi hin disente an lima katawo nga pamilya. Mas nalulubong ha utang an mga parag-uma atubangan han natikadako nga gastos ha produksyon ngan panginabuhi.

Grabe an krisis han disempleyo. Milyun-milyon an waray pakabuhian, labina an mga kabatan-unan. Yukut-yukot nga mga trabahador nga Pilipino an matag-adlaw nga nag-aabrod agud mamiling hin trabaho. Resulta ini han pagbagsak han lokal nga produksyon, ngaduha ha manupaktura ngan agrikultura, bunga han todo nga liberalisasyon ha pag-iimport ngan pagbaha han langyaw nga mga epektos. Waray programa agud ipundar an lokal nga nasyunal nga industriya para ha produksyon han mga batakan nga panginahanglan han nasud. Dugang nga iginlulumos ni Marcos an Pilipinas ha utang.

Samtang nagkukuri an katawhan, waray hunong an sumpakiay han nagriribalay nga paksyon para ha kurakot ngan poder. Hirayo pa an eleksyon 2028, kundi nagtikang na an maniobrahan ngan banggaay. Agud ulangon an pagdalagan ni Vice President Sara Duterte, iginduso han kampo nga Marcos an impeachment. Ini bisan kun an tinuod nga hingyap dinhi han katawhan hustisya ngan pagpapabaton ha tanan nga dabi ha korapsyon ngan pangawat ha pondo han katawhan, labina gud an pinakahigtaas nga upisyal ngan pasimuno han burukrata kapitalismo nga hi Marcos.

Ginlalabawan ni Marcos an ngatanan nga naglabay nga niyutiyo nga presidente ha pagigin sunud-sunuran ha dikta han imperyalismo nga US. Ha ekonomiya, todo-hatag hi Marcos han mga pahalipay ngan pribilehiyo para ha mga langyaw nga kapitalista. Paluyu-luyo an pangangagaw han tuna para ha mga plantasyon ngan proyekto nga “renewable energy.” Samtang waray tuna nga igin-aalutaga ha mga parag-uma, aabrihan ni Marcos an 1,620 kaektarya nga katunaan para ha “economic security zone” para ha mga korporasyon nga Amerikano, ha balayan han Pax Silica. Ha natad han militar, waray katupong an pagdako han panmilitar nga pwersa han US ha sakob ngan kadagatan han Pilipinas, ha balayan han pangangandam ha imperyalista nga gerra kontra ha China. Buta nga natugot hi Marcos nga gamiton an Pilipinas komo dako nga base militar ngan lansaran han gerra nga agresyon ngan panginginlabot han US. Waray labot hi Marcos nga madanas ngan mag-antos an mga Pilipino ha gerra nga ginpapalarab han US.

Ginsusulsulan ngan ginsusunghan han US an pasista nga panmuypoy ha Pilipinas agud puypuyon an magkalain-lain nga porma han kontra-imperyalista nga pag-ato han katawhan Pilipino—armado ngan diri. Masobra usa kabilyon nga dolyar an igin-alutaga han US para ha Armed Forces of the Philippines (AFP) ha masunod nga lima katuig. Todo larga an panginginlabot ngan panunulsol han militar han US ha gerra nga kontra-gerilya ngan kampanya nga panmuypoy ngan pag-imponer han balaud militar ha kabaryuhan, ha tahub han Salaknib ngan iba pa nga “military exercise.” Ginsusuplayan han US an mga yunit han AFP han mga armas ngan iba pa nga higamit an tinagudti nga mga operasyon ha desperasyon nga perdihon an padayon nga paghiluag ngan pagsamwak han BHB.

Ha mata han katawhan, katugbang an rehimen Marcos han waray katupong nga korapsyon, paghimakuri ngan kagutom han masa, panginyupo ha mga langyaw, ngan pasista nga panmuypoy. Ha hiluag nga katawhan, klaro nga hi Marcos an nagtataglawas ha dunot ngan kadaan nga sistema nga ginhahadian han imperyalista nga US ngan kakunsabo nga pipira nga naghahadi nga klase. Hi Marcos yana an numero uno nga nagduduso ha katawhan Pilipino nga magbuhat ngan hasugon an makuri nga dalan han pag-ato.

Ha magkalain-lain nga dapit han nasud, naglalarab an mga pakigbisog han masa agud depensahan an ira tuna ngan urukyan, ipakigbisog an makaburuhi nga suhol, suknaon an korapsyon, papagbatunon an mga paragdambong, depensahan an ira katungod, atuhan an paghibang ha kalibungan, igprotesta an presensya han mga langyaw nga tropa ngan depensahan an katalwasan han nasud. Igintutukod an ira mga organisasyon ngan duruyog hira nga nagios agud ipakigbisog an ira kaupayan ngan an interes han bug-os nga katawhan.

Ha kabaryuhan, madig-on nga naabante ngan natikahiluag an armado nga pakig-away, ha paghilapad han mga sona ngan prente gerilya. Diin man mahingadto, mapaso nga gintatapo han masa an mga Pula nga mangaraway han Bagong Hukbong Bayan, ngan mahugot nga ginhahangkop komo tinuod nira nga Hukbo. Pinaagi han BHB, nadig-on an determinasyon han hiluag nga masa nga parag-uma nga tumindog ngan atuhan an panmuypoy ha ira han mga parupanlupot han tuna kaupod an mga binaydan nira nga pasista.

Atubangan han nahiaaguman nga panmuypoy ngan pananalumpigos han katawhan Pilipino, determinado an Partido nga magserbe nga pwersa nga aada ha rubas ngan namumuno ha ira pakigbisog agud tapuson an pananalumpigos, bag-uhon an ira kapalaran ngan ipundar an bag-o nga nasud nga talwas ngan demokratiko. Ha diwa han kagiusan pagtutul-id, iginhahalad han mga kadre ngan kaapi han Partido an ira kabaltok ngan bug-os nga kusog para ha hingyap han katawhan. Napakain man an masa, hilarum ngan hiluag nga nagamot an Partido agud giyahan hira ha paghasog ha dalan han pag-ato.