Pinagkumbina nga operasyon a haras, demolisyon ken panagdusa ti inpatungpal ti New People’s Army (NPA)-Masbate (Jose Rapsing Command) iti unos ti siyam nga aldaw tapno disnogen ti pinagtipon a pwersa ti militar, pulis ken dagiti CAFGU.

Idi Marso 24, pinabettakan dagiti Nalabbaga a mannakigubat ti detatsment ti CAFGU iti Barangay Manlut-od, Placer. Dua ti natay ken dua ti nasugatan kadagiti pasista.

Idi Marso 22, maysa nga operasyon haras ti insayangkat ti Nalabbaga a hukbo iti maysa kadagiti hedkwarters ti militar iti Barangay Estampar, Cataingan. Pinaputokan met dagiti Nalabbaga a mannakigubat ti tropa ti militar a nakaistasyon iti Barangay San Vicente, Dimasalang idi Marso 15.

Idi Marso 17, pinaralisa ti NPA-Masbate ti maysa a mixer truck iti Barangay Santa Cruz, Placer a sanikua ti maysa a kumpanya iti konstruksyon gapu iti panaglabsing iti pagallagadan ti rebolusyonaryo a tignay.

Idiay Bukidnon, inyatnag ti NPA ti pannusa iti maysa a negosyante a managkamkam ti daga iti Barangay Siloo, Malitbog idi Abril 5. Pinuoran ti Nalabbaga a hukbo ti maysa a pasdek ken makina a maar-aramat iti panagproseso ti kamoteng kahoy a mapatta-patta a ₱3 milyon. Nakumpiskar met ti hukbo ti maysa a paltog ken dua a radyo.

Aktibo a depensa. Idiay Camarines Sur, dua a daras a nakapagdepensa ti NPA-West Camarines Sur (Norben Gruta Command) iti panagatake dagiti soldado ti 81st IB ken 16th IB idi Pebrero 23 ken 24 iti ili ti Ragay. Saan a bumaba iti 11 soldado ti napatay ken pito ti nasugatan. Napasag ti Nalabbaga a mannakigubat a ni Angelo “Ka Kim” San Diego.

Idiay Negros Occidental, nakapagdepensa met ti yunit ti NPA-Northern Negros (Roselyn Jean Pelle Command) laban iti panag-atake ti 79th IB idi Marso 18 iti Barangay General Luna, Toboso. Tallo a soldado ti inyulat ti 79th IB a nasugatan iti labanan ngem mapatta-patta nga ad-adu pay ti nadangran.