Agkaykaysa a lumablaban dagiti manursuro ken empleyado dagiti pribado ken pangpubliko nga unibersidad tapno isakad dagiti karbengan ken pagimbagan da. Babaen ti pannakinegosasyon para iti collective bargaining agreemement (CBA) da, ilablaban dagiti unyon dagiti manursuro ti nainkalintegan a sweldo, dagiti benepisyo ken dadduma pay a karbengan.

Idi Marso 25, nagturong ti University of Santo Tomas Faculty Union (USTFU) iti upisina ti National Conciliation and Mediation Board (NCMB) ti Department of Labor and Employment (DOLE) idiay Intramuros, Manila tapno agipila ti notice of strike. Nagdesisyon ti unyon nga ipila daytoy kalpasan ti nasurok makatawen a katulagan iti administrasyon kanaig ti CBA para iti 2021-2026.

Nagdeklara ti unyon ti deadlock idi Marso 14 gapu kadagiti saan a maawat a diaya ti administrasyon. Karaman kadagiti iruprupir ti USTFU ti 100% a benepisyo iti salun-at para iti amin a kameng ti unyon, nangatngato a badyet para kadagiti promosyon ken dadduma pay a benepisyo.

Nagisayangkat ti rabii ti kararag ken pannakikaykaysa ti USTFU iti kampus idi Marso 26, maysa nga aldaw kalpasan nga agipila da ti pakdaar iti welga. Dimmar-ay ken nakikaykaysa iti tignay dagiti kameng ti Ugnayan ng mga Nagkakaisang Manggagawa ng UST Hospital ken dagiti kabataan a Tomasino.

Idiay Lyceum of the Philippines University (LPU), nagdesisyon metten ti Lyceum Faculty Association (LFA) nga agipila ti notice of strike idi Marso 26 gapu iti deadlock iti negosasyon para iti CBA. Iruprupir ti LFA iti CBA ti nayon a sweldo, alawans ken panangikkat ti inkapilitan a panagretiro kalpasan ti 20 tawen a serbisyo dagiti manursuro.

Malaksid iti UST ken 4LPU, madama met nga agtultulid ti negosasyon dagiti unyon ti manursuro iti Siliman University ken Centro Escolar University.

Kabayatanna, napaatras dagiti empleyado ti Benguet State University (BSU) a nakaipasidong iti sistema a Job Order (JO) ken Contract of Service (COS) ti maysa a saan a nainkalintegan a katulagan nga ipilpilit kadakuada ti administrasyon. Idi Marso 24, pinilit ti BSU dagiti JO/COS a pumauneg iti katulagan a nakalanad a makaawat da laeng ti sweldo iti panawen nga adda ti umdas a pondo ti unibersidad.

Sakbay pay ti kontrobersyal a kontrata, kanayonen a matantantan ti sweldo dagiti kontrakwal. Segun kadagiti ulat, saan da pay a naaw-awat ti sweldo para iti Pebrero bayat nga adda sumagmamano a saan pay a nakaawat ti para Enero.

Iti pannakaibunannag ti kasasaad da iti publiko, napilitan ti BSU nga agiruar ti pablaak ken panangilawag ditoy. Nagrason ti administrasyon ti unibersidad a talaga nga agkurkurang ti pondo iti agdama ngem sigurado kano a bayadan da dagiti JO/COS.

Kadagitoy a laban dagiti manursuro, nagiyebkas ti sibubukel a suporta kadakuada ti Alliance of Concerned Teachers ken dagiti balangay daytoy.