Ginkumbinar nga operasyon haras, demolisyon kag pagsilot ang ginpatigayon sang Bagong Hukbong Bayan (BHB)-Masbate (Jose Rapsing Command) sa sulod sang siyam ka adlaw agud birahon ang gin-isa nga pwersa sang militar, pulis kag mga CAFGU.

Sadtong Marso 24, ginpalukpan sang mga Pulang hangaway ang detatsment sang CAFGU sa Barangay Manlut-od, Placer. Duha ang napatay kag duha ang napilasan sa mga pasista.

Sadtong Marso 22, isa ka operasyon haras ang ginlunsar sang Pulang hukbo sa isa sa mga hedkwarters sang militar sa Barangay Estampar, Cataingan. Ginpalukpan man sang mga Pulang hangaway ang tropa sang militar nga nagakampo sa Barangay San Vicente, Dimasalang sadtong Marso 15.

Sadtong Marso 17, ginparalisa sang BHB-Masbate ang isa ka mixer truck sa Barangay Santa Cruz, Placer nga ginapanag-iyahan sang isa ka kumpaniya sa konstruksyon tungod sa paglapas sa pagsulundan sang rebolusyonaryong kahublagan.

Sa Bukidnon, ginpapanaugan sang sangsyon sang BHB ang isa ka negosyante nga nagapang-agaw sang duta sa Barangay Siloo, Malitbog sadtong Abril 5. Ginsunog sang Pulang hukbo ang isa ka bilding kag makina nga ginagamit sa pagproseso sang kamote kahoy nga ginabana-bana ₱3 milyon. Nakumpiskar man sang hukbo ang isa ka pusil kag duha ka radyo.

Aktibo nga depensa. Sa Camarines Sur, duha ka beses nga nakapangapin ang BHB-West Camarines Sur (Norben Gruta Command) sa pag-atake sang mga soldado sang 81st IB kag 16th IB sadtong Pebrero 23 kag 24 sa banwa sang Ragay. Indi magnubo sa 11 ka soldado ang napatay kag pito ang napilasan. Napatay ang Pulang hangaway nga si Angelo “Ka Kim” San Diego.

Sa Negros Occidental, nakapangapin man ang yunit sang BHB-Northern Negros (Roselyn Jean Pelle Command) batuk sa pag-atake sang 79th IB sadtong Marso 18 sa Barangay General Luna, Toboso. Tatlo ka soldado ang gin-report sang 79th IB nga napilasan sa sumpunganay apang ginabana-bana nga madamo pa ang nahalitan.