Napadisi iti poder ni South Korean President Yoon Suk Yeol idi Abril 4 kalpasan a pasingkedan ti Constitutional Court ti impeachment kenkuana ti parlamento idi Disyembre 14, 2024. Nagtaud daytoy iti panangideklara ni Yoon iti linteg militar idi Disyembre 3, 2024, a naibilang a maysa a gandat a kudeta.

Gapu ta napadisin iti kinapresidente, mabalinen a sumango kadagiti kanayonan a kaso a kriminal ni Yoon. Kabayatanna, kasapulan a makaiyaramid ti espesyal nga eleksyon ti South Korea iti uneg ti 60 aldaw.

Ti desisyon ti korte ket rinambakan ti minilyon nga umili a nakipaset kadagiti protesta iti kalsada. Nupay kasta, nagpanawagan ti Korean Confederation of Trade Unions (KCTU) ken Nodutdol, grupo dagiti Korean a nakabase idiay US, iti tuluy-tuloy a panagtignay ti umili a Korean para iti naan-anay a demokrasya iti pagilyan ken panangpadisi iti okupasyon ti US ken pananggibus iti kapitalista a panangadipen iti pagilyan da.