Ad-adda a pabpabaraen tatta ti imperyalismo a US ti imperyalista a susik iti intero a lubong. Indeklara itay nabiit ti imperyalista a gubyerno ti US ti inawagan daytoy a “deterrence strategy” wenno “estratehiya ti panangtubeng” laban iti “agresyon ti China” iti South China Sea, tapno kano “gun-oden ti kapya babaen ti pigsa” ken “liklikan ti gubat.”

Ti deklarasyon ket inaramid ni Defense Sec. Pete Hegseth ti US idi bimmisita iti Pilipinas idi maudi a lawas ti Marso. Saan a malapdan ti panagkalawikiw ti ipus ni Marcos ken dagiti aso-aso ti Amerikano nga upisyal iti panangiyuna ni Defense Sec. Gilbert Teodoro, a nangidiaya iti US nga aramaten ti pagilyan para iti estratehiya daytoy. Daytoy ket kalpasan a kinarian isuda ti nasao nga upisyal ti US nga ituloy ti panangited ti $500 milyon nga ayuda a militar.

Kalpasan ti mano nga aldaw, iti mandar ti US, inyanunsyo ni Gen. Romeo Brawner, hepe ti Armed Forces of the Philippines (AFP), a palawaen ti sakupen ti operasyon ti AFP labes pay iti murdong nga isla ti Mavulis iti Batanes. Minandaran na ti Northern Luzon Command nga agsagana nu bareng adda ti “panagraut iti Taiwan.” Kinapudno na, kayat ti US nga ipwesto idiay ti ad-adu a soldado a Pilipino tapno agserbi nga alalay dagiti tropa nga Amerikano a balak daytoy nga ipwesto asideg iti Taiwan.

Kasapulan a sipipinget a laksiden ken labanan ti umili a Pilipino ti panagpaaramat ti rehimen Marcos iti estratehiya ti imperyalismo a US ken panangiguyod iti Pilipinas kadagiti operasyon militar ti US. Awan sabali nga ibunga daytoy nu di ti panangipakat ti umad-adu a tropa, barko a nabal ken ramit a panggubat ti US iti Pilipinas, kas ti ar-aramiden daytoy iti Japan, South Korea ken dadduma pay. Nakapaturong daytoy iti panangpairteng ti panagsagana ken panangparparnuay ti US ti gera iti rehiyon Asia-Pacific, umannurot iti estratehiko a panggep daytoy a “lapdan” ti panagdakkel ti bileg ti karibal daytoy a China.

Ti panangidungdungpar ti US ti estratehiya daytoy ket mangrabrabngis iti panagwaywayas ti Pilipinas. Igalgalut daytoy ti Pilipinas kadagiti plano ti US ken ik-ikkatan ti pagilyan ti kabaelan nga agaramid ti bukod a pangngeddeng kadagiti saritaan a pangruar. Iti panangpabor ni Marcos kadagiti plano a militar ti US, serserraan na ti nadumaduma a posible a dana, nangruna ti nakapya ken diplomatiko a dalan ti panangsango iti China tapno risuten dagiti susik para iti patas a pakinabang. Uray pay maikabil iti peggad ti biag ti ginasut a ribo a Pilipino, agpapaaramat tatta ni Marcos ken ti AFP iti US iti plano daytoy a papudoten ti sitwasyon idiay Taiwan iti gandat a probokaren ti China nga agaramid ti agresibo nga addang militar.

Baybay-an ni Marcos nga ad-adda a pairuten ti US ti kontrol iti AFP babaen ti aw-awagan daytoy a joint trainings tapno umalalay kadagiti tropa nga Amerikano ken agbalin nga managnamnama kadagiti suplay manipud iti militar ti US. Parparwaren da a “kabalikat” wenno kabinnadang da ti AFP, nu pay ti kinapudno ket ar-aramaten ti US ti AFP kas pyesa iti estratehiya daytoy nga ipataw ti hegemonya wenno bileg iti Asia.

Ti “estratehiya ti pananglapped” ti US ket maysa laeng a kalub tapno ikalintegan ti panagpakat kadagiti tropa a militar daytoy iti nadumaduma a paset ti lubong. Imbes a lapdan, ad-adda laeng nga ingatngato daytoy ti posibilidad a bumtak ti gera. Ipakpakita ti pakasaritaan a ti mano a tawen nga agresibo a panagipakat ti US kadagiti pwersa militar ken dagiti ramit a panggubat iti daya a paset ti Ukraine, iti nagan ti panangtubeng iti panagpalawa ti Russia, ket nangparnuay ti gera idi 2022.

Ad-adda laeng daytoy nga idurduron ti karera iti armas, nu sadinno nga ad-adda a dumakdakkel ti rekurso a pangpubliko ti mabusbusbos iti panangpadur-as ken produksyon dagiti armas a panggubat, imbes nga ilatang kadagiti kasapulan a serbisyo a panggimong.

Ti patakaran a “pananglapped” ti US ket umannurot iti aw-awagan daytoy nga Indo-Pacific Strategy tapno palikmutan ti China babaen ti panagpakat ti pigsa a militar, partikularen kadagiti kabaybayan iti daya a paset daytoy. Ti kastoy nga estratehiya ket ad-adda laeng nga agtennag iti kumarkaro a tensyon militar iti South China Sea ken dadduma a paset ti rehiyon, kagiddan ti panagregget ti China a batogan dagiti aksyon ti US babaen ti panagpakat ti bukod daytoy a pwersa a nabal ken pangbaybay. Dumakdakkel ti posibilidad ti kamali a kalkulasyon a mabalin a dumteng iti panagbettak ti armado a rinnupak.

Ar-aramaten ti US ti Pilipinas a dakkel a base-militar para iti forward-deployment wenno abante a panagpwesto dagiti opensibo nga armas panggera. Idi napalabas a tawen, inpwesto ti US ti Typhon missile system, iti deppaar ti amianan a Luzon. Daytoy ket limed iti publiko a naiyakar iti sabali a lokasyon, ken mapagam-amakan nga adda iti maysa nga isla iti Batanes. Iti umay a Balikatan war exercises, a naituding a dar-ayan ti dumanon iti 10,000 tropa nga Amerikano, plano ti US nga ipwesto ti armas a NMESIS (Navy Marine Expeditionary Ship Interdiction System), maysa a kontra-barko a missile system, nga addaan kabaelan nga agpatayab ti misayl iti kaadayo a 185 kilometro. Plano met nga iyeg ken aramaten ti US Navy iti Pilipinas dagiti “unmanned surface vehicle.”

Nu patien dagiti pablaak ni Hegseth, naituding nga iturong ti US iti sidong ti gubyerno a Trump ti dumakdakkel nga atensyon daytoy iti Asia, kabilang iti Middle East, ken iyakar ditoy ti umad-ado a pwersa manipud iti Europe. Maysa daytoy iti rason a kayat a leppasenen ni Trump ti gera idiay Ukraine tapno saanen a maigalut idiay.

Iti sango daytoy a sitwasyon, kasapulan a nairut nga agkaykaysa ti umili a Pilipino ken napigsa nga iyebkas ti patriyotiko a pukkaw tapno rumuk-at manipud iti kontrol militar ti US. Daytoy a kontrol militar ket adda iti langa ti presensya ti rinibo a tropa nga Amerikano kadagiti base militar na iti Pilipinas, panangaramat iti pagilyan para iti panangisayangkat ti agsasaruno ken awan-ressat a panagsanay iti gera, panagipwesto kadagiti armas a panggubat kadagiti EDCA site, panangted ti ayuda a militar iti kampanya ti panagbomba ken panag-istraping ti AFP laban iti NPA ken masa a mannalon ken panagidiktar iti “AFP modernization” a mangob-obliga iti AFP nga iti US laeng a gumatang ti ramramit, rason nga ad-adda a nakagalut ken nakasanggir iti US.

Nasken ingge’t pigsa nga agprotesta ti umili a Pilipino laban iti plano a Balikatan war games, nga ad-adda a mangiguyod iti pagilyan iti imperyalista a risiris iti baet ti US ken China. Rumbeng a sipipinget nga iduron ti kadawatan para iti demilitarisasyon ti South China Sea, ken ti panangrisut kadagiti susik iti kabaybayan babaen ti natalinaay a dayalogo. Kasapulan a tumakder ti umili para iti madagdagus a panangduprak kadagiti base militar, panangpapanaw iti amin a tropa nga Amerikano, panangibasura iti Enhanced Defense Cooperation Agreement (EDCA) ken amin a saan a patas a tratado a militar ken pananggibus ti ayuda a militar iti represibo ken pasista a rehimen Marcos.