Ginasut a ribo nga umili nga Amerikano, kaadwan dagiti mangmangged, ti nagbuyat kadagiti kalsada ken parke idi Abril 5 iti saan a bumaba iti 50 estado iti US tapno kundenaren ti nadumaduma a kontra-umili a patakaran ni Donald Trump ken ti bilyunaryo a tagabalakad na a ni Elon Musk. Mapatta-patta a dumanon iti 250,000 ti dimmar-ay iti 1,200 protesta ken panagtitipon iti intero a pagilyan.

Dagiti aksyon ket naawagan a protesta a “Hands Off!” (“Saan na kami a garawen!”) Panawagan da nga isardengen da Trump ken Musk dagiti atake kadagiti trabaho, karbengan ken pagimbagan da. Maysa kadagiti kadakkelan a panagtitipon ket iti National Mall idiay Washington DC, asideg iti White House, ti upisyal a pagtaengan ken upisina ti presidente.

Dagiti protesta ket inorganisa ti nasurok 150 grupo, kabilang dagiti organisasyon iti karbengan sibil, dagiti unyon ti mangmangged, dagiti mangitantandudo ti LGBTQ+, dagiti beterano ken dagiti aktibista iti eleksyon. Dagiti dimmar-ay ket nagiyebkas ti pannakadismaya kadagiti gandat ni Trump a pabassiten ti gubyerno a pederal, panangikkat iti nasurok 200,000 trabaho iti gubyerno ken dadakkel a panangkissay kadagiti benepisyo iti gimong.

Inyebkas met dagiti nagprotesta ti gura da kadagiti patakaran ni Trump kas ti nasaknap a deportasyon dagiti imigrante, panangkissay iti pondo para iti edukasyon ken salun-at ken panangikkat kadagiti proteksyon para iti LGBTQ+. Nainget a kinundenar da ti papel ni Musk, ti kabaknangan nga oligarko iti lubong, iti Department of Government Efficiency a nagipatungpal iti panangikkat iti saan a bumaba iti 30,000 empleyado ti gubyerno.

Ipakpakita dagiti protesta a “Hands Off” ti nakaro ken nasaknap a rurod ti umad-ado nga Amerikano ken Trump, tallo a bulan pay laeng manipud idi nagtugaw isuna iti White House iti maikadwa a gundaway. Nagisayangkat met kadagiti protesta dagiti Amerikano nga adda iti ruar ti US, kas idiay France, Germany, United Kingdom ken Portugal.