Pannakikaykaysa ti Marawi iti umili a Palestino. Nasurok-kumurang 800 a residente ti Marawi City ti nagisayangkat ti “solidarity run” iti “Ground Zero” ti syudad idi Marso 27 kas pannakikaykaysa iti umili a Palestino kalpasan nga inbasura ti Israel ti ceasefire ken balbaliw a binomba daytoy ti Gaza. Umaw-aweng ti pukkaw dagiti nakasaka-saka a dumar-ay para iti “Free Palestine” ken “From the river to the sea, Palestine will be free” iti sigud a naregta a komunidad. Agingga ita, saan pay a nakasubli dagiti residente iti Ground Zero a narungsot a binomba ti rehimen Duterte idi 2017.

Panangngato ti singir iti LRT. Nagtitipon dagiti mangmangged, estudyante ken nakurapay iti Monumento LRT-1 Station maysa nga aldaw sakbay a naglayon a naipangato ti plete ditoy idi Abril 2. Binabalaw da ti panagkedked ti rehimen Marcos nga ipasardeng ti panagngato ti plete ken waswasen ti kontrata ti estado iti pribado a kumpanya a mangpatpataray ti serbisyo. Kabilang kadagiti simmupyat dagiti komyuter manipud iti Camanava nga addaan dakkel a populasyon ti umili ken mangmangged a mangnamnama iti serbisyo ti LRT.

Panagngato iti singir ti danum. Naguurnong idi Abril 1 dagiti kameng ti Bayan Muna iti sango ti upisina ti MWSS Regulatory Office iti Quezon City tapno kundenaren ti panagngato ti singir iti danum tatta a bulan ken ipanawagan ti #NoToWaterRateHike. Nakasagana a maipangato ti singir iti danum iti ₱4-₱5 kada metriko kubiko kalpasan a palubosan ti MWSS.

Panagngato iti presyo dagiti produkto a petrolyo. Nagprotesta iti sango ti gasolinaan ti Petron dagiti kameng ti Bayan Muna idi Marso 30 laban iti ₱1.40/litro a panagngato ti presyo ti langis a naipatungpal idi Marso 31. Iti daytoy nga aldaw, inpatulod ti Bayan Muna ti surat iti Department of Energy tapno singiren ti departamento iti kinaawan addang daytoy tapno ipatungpal ti mandato ti Korte Suprema idi 2024 para iti “unbundling” ti presyo wenno panangobliga kadagiti kumpanya ti langis a binsa-binsaen dagiti produkto a petrolyo ken ipakita ti detalye iti panagngato dagitoy.