Nagisayangkat ti nadumaduma nga aktibidad dagiti organisasyon a paset ti National Democratic Front (NDF) kadagiti syudad ken sentro ti ili kas panagrambak iti maika-56 nga anibersaryo ti New People’s Army (NPA) idi Marso 29. Pinadayawan da dagiti Nalabbaga a mannakigubat ken kumander ti NPA iti saan a magungon a rebolusyonaryo a pakinakem da iti panangiyabante ti armado a dangadang iti kaaw-awayan.

Idiay Manila, nagikasa ti rali nga apagdarikmat ti nasurok 60 a kameng ti Kabataang Makabayan (KM) idiay Earnshaw Avenue, Sampaloc idi Marso 31. Awit dagiti kameng ti KM dagiti ladawan da Kadwa Jose Maria Sison, Kadwa Benito Tiamzon ken Kadwa Wilma Austria-Tiamzon. Pinadayawan da ti tallo karaman ti adu pay, a nagibuwis ti biag ken nagidaton ti panawen para iti panangiyabante ti rebolusyon a Pilipino.

Idi Marso 30, maysa a martsa ti insayangkat ti KM, Liga ng Agham para sa Bayan, Katipunan ng mga Gurong Makabayan, Revolutionary Organization of Lumads, Cordillera People’s Democratic Front ken Katipunan ng mga Samahang Manggagawa iti uneg ti University of the Philippines-Diliman idiay Quezon City.

Inangay met ti KM-Kira Mindoro ti ababa a programa iti uneg ti Polytechnic University of the Philippines (PUP)-Manila idi Marso 29. Bitbit da ti dakkel nga istrimer ken dagiti bandera ti Partido, NPA ken NDF nga insab-it da iti maikapat ken maikalima a kadsaaran ti pasdek iti kampus kalpasan ti programa.

Agsusumbangir met ti operasyon-dikit ken operasyon-pinta dagiti rebolusyonaryo nga organisasyon para iti anibersaryo. Nakita dagiti pinta, poster, istiker ken dadduma pay a partuat-arte ti KM iti PUP-Manila, De La Salle University-Manila, College of Saint Benilde ken Rizal Avenue idiay Manila.

Nagipinta ken nagikabit kadagiti poster ti Christians for National Liberation iti bennat ti Aurora Boulevard Extension idiay Quezon City. Ti KM-SMR ket nagipaskil met kadagiti pablaak ken istiker kadagiti unibersidad iti rehiyon ti Davao a balwarte dagiti Duterte.

Nagiruar met ti pablaak ti nadumaduma a pangrehiyon a balangay ti NDF ken dagiti organisasyon iti sidong daytoy tapno kablaawan ti anibersaryo ti NPA. Kasta met a nagidanon ti kablaaw iti anibersaryo ti sumagmamano nga internasyunal a partido ken organisasyon kabilang ti Friends of the Filipino People in Struggle, Cairde na Filipínigh Committee of Anti-Imperialist Action Ireland ken Communist Party of Australia (Marxist-Leninist).