Iti uneg ti New People’s Army (NPA), nadumaduma a propesyon ti masursuro dagiti Nalabbaga a mannakigubat. Iti panangiyabante ti gubat, umak-akem da met kas manursuro, abugado, artista, kumakanta, nars wenno duktor ken dadduma pay a trabaho, amin para iti interes ti masa a maidadanes.

Daytoy ti nasursuro ni Kadwa Sey, maysa nga agtutubo a mannakigubat nga agdama nga agtigtignay iti rehiyon ti Bicol. Manipud kinaubing, arapaap na nga agbalin a doktor ngem ammo na a saan a kabaelan dagiti nagannak na a pagadalen isuna iti medisina.

“Anya laeng met koma ti dua nga ektarya a daga iti lima nga agkakabsat a ti rigat ti biag ket maysa a kur-ay, gistay awan ti matuktok,” kunana. Ammo ni Ka Sey a “minilyon” ti kasapulan tapno makaadal ken makaturpos iti burges a pagadalan. Literal laeng isuna a “nakaaddak” iti kolehiyo gapu ta saan a kaya a sungbatan ti nakabasbassit a sweldo manipud iti panag-“working student” na dagiti magastos iti pagadalan.

Saan a baro ken Ka Sey ti rebolusyonaryo a tignay. Dagiti nagannak na ket aktibo a kameng ti Partido iti lokalidad. Dimmakkel isuna a masansan a makalangen dagiti kakadwa.

“Nakayawan” isuna iti NPA a makagapu ti panagkameng na iti hukbo ti umili. “Sabali talaga ti dating” ti NPA kaniak. Tunggal mapanak kadakuada ken nu nagawidakon idiay balay ket kasla adda kurang kanyak,” kunana. “Kasla love at first sight.”

Iti uneg ti hukbo, in-inot a napauneg na ti pannakaawat na kadagiti banbanag. Kadwa ti kapada na a mannakigubat, ad-adalen na ti gimong ken rebolusyon ken natured nga insapraktika na dagiti naadal ditoy.

“Ngem ti pinaka-eksayting, ditoy gayam a mabalin nga ituloy ti arapaap ko – ti agbalin a doktor!” kuna ni Ka Sey.

Itay nabiit, nagturpos isuna ken ti 11 pay manipud iti nadumaduma a yunit ti NPA-Bicol ti pagsasanay medikal nga insayangkat ti maysa a larangan gerilya ti Norben Gruta Command. Dakkel a balligi daytoy iti panagabante ti rebolusyonaryo a trabaho. Insagana daytoy dagiti Nalabbaga a mannakigubat tapno mangted ti libre a serbisyo medikal iti masa a mannalon.

Iti panagturpos na, nagbalinen a naan-anay a kombat medik ni Ka Sey.